BANGKOK, Thailand – Diamars den oranan trempan di anochi , personal di un hotel di cinco strea na Bangkok a bin topa cu un escena hororoso den un camber di e hotel riba di 5 piso. Aki e personal a bin topa cu seis curpa sin bida den un camber. Cuater curpa a wordo haya na e mesa di comedo y dos den e dormitorio. Segun Polis local e victimanan tur ta hoben y probablemente lo a wordo venena cu Cyanide.
Ta trata di seis vietnames hoben 3 masculino y 3 femenino, entre nan dos tabata tin nacionalidad Americano.
Polis ta sospecha cu por ta trata di un represaya, cu por tin di haber cu un disputa comercial, of algo relaciona cu un secta. No tabata tin niun señal di maltrato of ladronicia. Segun medionan local, polis ta buscando dos persona di nacionalidad vietnames.
E consecuencia pa turismo
Prome Minister Srettha Thavisin di Thailand, despues di a tuma nota di e sucedido, mesora a presenta na e hotel. Segun declaracionnan haci di parti di vocero di gobierno di Thailand, “ Prome Minister a duna instruccion na e instancianan concerni pa investiga profundamente e caso aki y tambe pa tuma accion urgente pa asina trata na evita consecuencianan negativo pa turismo”.
E curpanan a wordo haya den un camber di e hotel di cinco strea Grand Hyatt Erawan. Tambe durante investigacion a tuma nota cu e victimanan a bebe coffie y te. E personal di e hotel a bin topa cu e porta di e camber habri. E victimanan mester a haci nan check out anochi y nan maletanan tabata cla paketa caba.
Tourguide
Nan guia Thailandes, e unico sobreviviente, a wordo hiba na un warda di polis pa interogacion. E curpanan di e victimanan a wordo confisca y hiba pa Chulalongkorn Hospital pa autopsia.
E hotel ta keda banda di e famoso santuario di Erawan y e famoso centro comercial Central World cu sigur ta hopi conoci pa esnan cu a yega di bishita Bangkok. Na 2015 un bom a explota na e santuario, cu cu tabata un sitio hopi popular entre otro pa e bishitantenan Chines. Den e atake aki 20 persona a muri y hopi otro herida.
Tiramentu
Aña pasá mas ku 28 miyon turista a bishitá Thailandia. E gobierno ta spera 35 miyon bishitante e aña aki pa motibo cu a haci e periodo di estadía di visa mas largo, pa diferente nacionalidad.
Na october aña pasa, durante un tiroteo den un centro comercial luhoso, cerca di Grand Hyatt Erawan, dos turista a fayece.
