Oranjestad 12 di juli 2024 – Aruba Bank ta orguyoso di a forma parti di e tayer di 3 dia di Kompas for Students Aruba Foundation, un iniciativa vital dedica na apoya e studiantenan cu ta bai sigui studia na Hulanda.
E fundacion aki ta resalta e compromiso di Aruba Bank den e desaroyo di educacion, y formacion personal di e futuro di studiantenan.
Kompas for Students, funda na Amsterdam na 2018 y na Aruba na 2024, ta duna e herment esensial, conocemento, y guia na studiantenan Arubano cu ta prepara pa cuminsa un fase nobo den nan bida.
E programa ta enfoca riba e parti financiero, bienestar emocional, y desaroyo personal, asina garantisando cu studiantenan ta bon prepara den nan bida personal como tambe academico na Hulanda.
E programa Kompas 2024 ta inclui tayer riba presupuesto, nutricion, inteligencia emocional, y e cultura Hulandes, hunto cu un abono gratis pa un aña na un plataforma di salud mental online cu ta ofrece servicio di psicologia y topiconan di bienestar di salud mental.
Aruba Bank ta orguyoso di a patrocina Kompas for Students Aruba Foundation. E iniciativa aki ta alinea perfectamente cu Aruba Bank su balornan cu ta compromente na inculca educacion y desaroyo den nos comunidad. Aruba Bank ta kere den empodera nos hobennan cu e abilidadnan y confiansa cu nan mester pa logra exito.
