Heart-Centered Leadership Foundation (HCLF) ta entusiasma pa anuncia nan siguiente tayer pa hobennan cu ta enfoca riba desaroyo di habilidadnan esencial di comunicacion. E tayer tin como meta pa empodera hobennan cu tecnicanan practico di comunicacion door di diferente
actividadnan interactivo. Durante e sesion, lo enfatisa e importancia di scucha activamente, expresa pensamento claramente y comunica efectivamente den diferente contexto.
E tayer ta diseña pa yuda hoben mehora nan habilidadnan di comunicacion, cu ta esencial pa exito na scol, relacionan familiar y cu amistad, y futuro carera. Esaki ta un tremendo oportunidad en preparacion pa e aña escolar nobo, unda e hoben por cuminsa su aña miho equipa. Den un sesion interactivo, participantenan lo siña tecnicanan pa mehora nan comunicacion interpersonal y stimula nan autoestima. Tambe lo cubri tecnicanan pa resolve conflicto, yudando hobennan maneha y resolve desacuerdo na un manera efectivo y positivo. Ademas, nan lo tin e oportunidad di conecta cu otro hoben, creando amistadnan nobo.
E ambiente cu HCLF semper ta crea ta uno interactivo y cu ta brinda sosten na hobennan, caul ta haci e experiencia mas agradabel pa siña i desaroya.“E tayer aki ta ofrece hobennan un oportunidad unico pa cultiva habilidadnan necesario di comunicacion” a remarca Deanna Lampkin, trahado hubenil na Heart-Centered Leadership Foundation. “Comunicacion efectivo ta sumamente importante pa haci conexion significante, expresa bo pensamentonan cu confiansa, y maneha diferente situacionnan social y professional bon.”
E tayer aki lo tuma luga diasabra, 20 di juli 2024, di 1:30 PM pa 3:30 PM na Kiwanis Club of San Nicolas (situa na e piso ariba di Botica San Lucas na San Nicolas). Mayornan, familiarnan, docentenan y dimas comunidad ta invita pa comparti e tayer aki cu hobennan.
Cupo ta limita. Participacion ta gratis pero registracion ta necesario.
Pa registra of pa mas informacion, por tuma contacto cu e fundacion via whatsapp na 5841211. Por bishita Heart-Centered Leadership Foundation su facebook page tambe pa e link directo pa registra.
Tocante HCLF:
Heart-Centered Leadership Foundation (HCLF) ta un fundacion cu a keda estableci na 2008 cu e meta pa inspira y empodera hobennan di Aruba. Desde 2012 e fundacion ta ofrece diferente tayer, actividad y seminario unda hobennan ta haya oportunidad pa desaroya nan caracter y habilidadnan cu ta fortifica nan desoroyo personal y profesional.