DANKI EPI PA BOSO DEDICACION Y TRABOU VALIOSO NA E FUNDESHI DI NOS MUCHANAN
ORANJESTAD – Diamars anochi den e ballroom di Aruba Marriott Resort & Casino a tuma luga e graduacion di e studiantenenan di EPI, facultad Salubridad y Servicio. Prome Minister Evelyn Wever-Croes tabata presente na e evento aki, compartiendo asina e momento bunita aki cu e graduadonan. E mandatario a expresa cu e temporada aki ta uno hopi bunita pasobra ta e temporada na unda nos por celebra tur e añanan di dedicacion di e hobennan aki pa culmina nan estudio exitosamente.
Manera ta conoci, EPI ta e scol mas grandi di MBO cu tin na Aruba, y ta na unda nos hobennan ta haya e preparacion necesario pa por drenta e mercado laboral exitosamente. Sigur un joya di facultad cu ta yuda nos hobennan desaroya nan mes pa por ocupa posicionnan importante den futuro. E facultad di Salubridad y Servicio ta prepara e muchanan pa duna un miho servicio na comunidad en general, y na tur e bishitantenan, y esaki ta algo cu tur hende directamente of indirectamente ta beneficia di dje.
“Den nomber di Gobierno di Aruba, mi ta gradici EPI no solamente pa e invitacion sino tambe pa nan dedicacion y trabou na e fundeshi di nos hobennan. Tambe mi ta gradici e mayornan pa tur e sosten cu nan ta duna na nan yiunan pa asina nan por logra caba nan estudio. E tabata un anochi hopi bunita y emocionante pa wak e alegria y satisfaccion cu cada graduado tabata refleha. Masha pabien na tur e graduadonan y hopi exito den futuro”, Prome Minister a expresa.