Un cambio cu Parlamento di Aruba a aproba diahuebs ultimo den e Presupuesto Supletorio 2024 ta aumento di e fondo cu Afl. 317.500,- pa por duna subsidio na mayornan pa cubri algun gasto di scol di nan yiu. Ta trata di e asina yama ‘begunstigend beleid’. Un maneho y fondo existente pero cu mescos cu mi persona aparentemente hopi hende no sa di dje.
Hopi mayor no conoce e posibilidad aki cu Gobierno tin pa yuda mayornan cu tin un entrada di Afl. 37.000,- of menos pa aña (Afl. 3083,- pa luna) y tin un yiu studiando na Colegio Arubano. Te cu recien e posibilidad aki tabata pa studiantenan di Colegio Arubano so. Awor en adelante no ta solamente mayornan cu tin yiu ta bay Colegio Arubano so por aplica pero tambe por aplica pa otro scolnan di voortgezetonderwijs manera VWO, HAVO, MAVO y EPB.
Alabes durante e reunion publico Minister di Enseñansa a informa Parlamento cu ta bay aumenta e plafond di Afl. 37.000,- pa 42.000,- florin pa aña (Afl. 3500,- pa luna), esta si bo ta gana e suma ey of menos bo por aplica pa haya e ayudo cu cierto gastonan di scol di bo yiu.
Actualmente e subsidio maximo cu por haya ta Afl. 550,- pa yiu. E ayudo aki ta pa cubri gastonan di buki y/of grafische rekenmachine (GRM Texas Instruments). Banda di esaki por aplica tambe pa “vrije busvervoer”. Mirando e parti di digitalisacion cu ta tumando lugar den nos enseñansa segun PEN2030, mas y mas nos hobennan tin e necesidad awendia pa tin un computer propio pa por sigui y haci les. Esaki ta sea un laptop of un tablet pa por conecta na e plataformanan di scol. Mirando e reto financiero di varios famia ta bay amplia e subsidio cu e posiblidad pa aplica tambe pa Afl. 750,- pa por cumpra e device necesario.
Segun informacion ricibi for di Minister di Enseñansa solamente 1% di e fondo ta keda uza na e momentonan aki. Pesey mes lo bay duna mas informacion al respecto. Di mi banda, mediante entre otro e comunicado aki kier trece e fondo aki na conocemento di esnan cu por aplica p’e y tambe duna un splicacion di loke tur mester keda haci pa bo por bin na remarke.
Kico un mayor mester haci pa bin na remarca?
Pa aplica pa e subsidio mester haci uzo di e formulario di peticion publica riba e website di Departamento di Enseñansa https://www.ea.aw/pages/subsidio/ of pasa busca uno personalmente na Departamento di Enseñansa. Yena esaki, busca e documentonan necesario y pasa entrege na Departamento di Enseñansa. Mayornan mester keda pendiente di informacion di Departamento di Enseñansa cu lo ta saliendo den juli proximo. Intencion ta cu pa entrante dia 1 di augustus 2024 lo por cuminsa aplica.
Documentonan necesario
Declaracion di entrada: pa haci peticion pa un declaracion di entrada, e peticionario lo mester yena e formulario digital “Aanvraag inkomensverklaring” di Departamento di Impuesto (DIMP). Por haya e formulario aki riba e website impuesto.aw – impuesto.aw/inkomensverklaring. Esaki ta necesario pa bo por demostra cu bo ta gana menos cu Afl. 42.000,- pa aña.
Si bo persona ta ricibi entrada di “onderstand” di Gobierno, bo mester acudi na Departamento di Asunto Social na Lagoenweg 9-A pa busca un declaracion di entrada anual prome cu bay Departamento di Impuesto (DIMP). Si ta cobra pensioen mester acudi na SVB den Vondellaan y/of APFA na Seroe Blanco 4 pa busca un declaracion di entrada anual di pensioen prome cu bay Departamento di Impuesto (DIMP).
E formulario ta valido pa solamente 1 yiu (pa cada yiu mester entrega un formulario separa). Cada formulario ta rekeri di un stampia di Afl.4,= (obtenibel na postkantoor). Banda di esaki mester hiba e formulario Censo y Registro Civil pa e wordo registra y haya un stempel. Ta bon pa paga tino cu mester entrega hunto cu e formulario aki e recibonan di buki/rekenmachine/computer y tambe e carta di aceptacion na scol.
Mi ta sostene e cambio den maneho proponi pa Minister Endy Croes, y sigur e ta brinda un sosten na nos famianan vulnerabel. Di e forma aki nos ta percura pa alivia algun gasto di mayornan y sostene nos muchanan den nan desaroyo academico.