Home » Trio Venezolano declara liber di traficacion di 191 kilo di marihuana riba boto

Trio Venezolano declara liber di traficacion di 191 kilo di marihuana riba boto

Apesar cu Fiscal a exigi 40 luna di prison

by Admin
0 comment 100 views

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra un trio Venezolano, cu Guarda Costa a intercepta cu 191 kilo di marihuana scondi den 10 bari di gasoline.

ARUBA NATIVE por a compronde cu Fiscal a cuestiona cu e trio Venezolano aña pasa a wordo condena pa traficacion di droga y awor atrobe ta wordo gara. El a exigi 40 luna di prison pa tur tres. Hues a bisa cu e ta haya cu no tin indicacion cu e trio tabata sa di e droga y ta declara nan liber.

191 KILO DI MARIHUANA ARIBA BOTO

E tres sospechosonan ta e rumannan Dirimo Nuñez Diaz D.N.D.) (39), Edwin Nuñez Diaz (E.N.D.) (40) y Rowser de Jesues Guanipa (R d J.G.) ( 32), kendenan riba 2 Februari 2024 a wordo intercepta den oranan di marduga pa Guarda Costa, caminda a haya den 10 bari di gasoline 191 Kilo di marihuana.

A LOS TIRO DI ADVERTENCIA

Hues a mustra cu Guarda Costa a intercepta e boto cu 4 persona abordo y tabatin 10 bari gasoline abordo. Miembronan di Guarda Costa mester a los tiro di advertencia pa asina e boto a para. Durante e persecusion, e miembronan di Guarda Costa a mira con tabata tira cos for di e boto. Despues cu a para e boto a pisca esakinan for di laman.

En total 191 kilo di marihuana a haya den e barinan di gasoline. Hues a puntra e sospechosonan si nan tabata sa cu tin droga abordo. D.N.D. a bisa cu el a bin y cu su ruman E.N.D. ta e capitan. El a bisa cu e no tabata sa cu tin droga abordo di e boto. Hues a puntra kendenan tabata tira cos for di e boto. Tur tres sospechoso a bisa cu ningun hende a tira cos for di e boto den laman.

R.d J.G. a bisa cu e mester a paga 600 dollar pa bin Aruba ilegal. El a bisa cu el a mira 4 bari di gasoline banda di e motornan pero no tabata sa cu tin droga. E capitan E.N.D. a bisa cu e no tabata sa cu tin droga abordo. E di cuater sospechoso C., a wordo deporta. Hues a puntra Fiscal kico a pasa cu C. Fiscal a splica cu C. a wordo condena na 30 luna di prison pa complice di traficacion di droga y a wordo deporta pa Venezuela.

TUR TRES CONDENA CABA PA TRAFICACION

Durante tratamento di e caso, a sali na cla cu e trio aki aña pasa a wordo condena pa trece droga Aruba den boto. Esey ta e motibo cu e biaha aki nan a keda encarcela den KIA, pendiente e caso aki. Fiscal ta considera nan residivista. Hues mustra cu E.N.D. na Maart 2023 a wordo condena na 30 luna di prison pa traficacion di droga hunto cu D.N.D. R. d J.G. a wordo condena pa traficacion di hende y droga na 2021 y 2022. El a bisa Hues cu el a sinta su castigo. Fiscal a remarca cu na December 2023, R.d J.G. a wordo laga liber y atrobe e ta cay pa traficacion di droga.

FISCAL A EXIGI 40 LUNA DI PRISON

Fiscal a bisa cu 1 Februari 2024, pa mas o menos 1.15 anochi, Guarda Costa a mira un boto sospechoso. Dia 2 Februari 2024 pa 1’or marduga e boto tabata den awa territorial di Aruba y Guarda Costa a bay intercepta e boto. Pa 3’or di marduga a yega na boto y apesar cu a duna señal pa para, e boto a sigui core. Miembronan di Guarda Costa a mira dos hende tabata tira barinan den laman. E momento ey a dicidi di los tiro di advertencia cu a pone e boto para. Tabatin 4 persona abordo y den e barinan di gasoline a haya mas di 300 paki di marihuana. En total esaki a pisa 191 kilo.

Fiscal a remarca cu anterior ya caba e trio aki a haya condena pa importacion di droga. Fiscal a mustra cu R.d J.G. tabata sera pa traficacion di hende y droga y na December 2023 a wordo laga liber y a bolbe cu droga. Pa e rumannan D. ta mesun cos. Fiscal ta considera nan tres residivista di traficacion di droga. El a exigi 40 luna di prison y ainda nan mester caba di sinta e castigo actual cu nan ta sintando pa e condena di aña pasa. E boto lo keda confisca y e droga a wordo destrui.

ABOGADO

Abogado mr. Smit a bisa cu e trio a bisa cu nan no tabata sa cu tin droga abordo. Pesey e ta haya cu no por papia di importacion y posecion di droga. Na opinion di abogado, posiblemente e otro persona C., lo tabata sa di e droga. E ta haya cu no por papia di intencional y pesey mester declara nan liber.

HUES TA DECLARA E TRIO LIBER

Hues a sera tratamento di e caso y a dicta sentencia di biaha. Hues ta haya cu ta un hecho cu tabatin 191 kilo di marihuana abordo. Hues ta haya cu falta indicacion cu e trio tabata sa cu abordo di e boto tabatin droga. El a bisa cu E.N.D. como capitan mester tabata sa pero e ta bisa cu e no sa di droga. Hues a bisa cu e trio mester tene cuenta cu lo por tin droga abordo. Ta asina cu anterior tur tres a wordo condena pa traficacion di droga.

Hues a bisa cu door di no tin conocemento di e casonan ey, e no por huzga cu nan lo tabata sa di e droga abordo. Hues a sigui bisa cu e hecho cu e di 4 persona ya a wordo condena y deporta, e no sa kico e persona a declara. Tur e falta di informacion aki, a pone cu Hues a declara tur tres sospechoso liber di traficacion di droga. El a adverti nan pa nan no bolbe haci algo asina sino otro biaha si lo wordo condena. Ta asina cu por a mira cu Fiscal no a keda nada contento cu e sentencia. A base di ley, Fiscal tin 2 siman pa apela e sentencia. Tempo lo mustra si Fiscal ta apela e sentencia. Si esey sosode, e ora ey Corte Superior lo trata e caso. Entretanto, e trio lo mester keda encarcela pa e castigo cu nan a wordo condena aña pasa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio