ORANJESTAD – Diahuebs mainta 27 di juni, Prome Minister Evelyn Wever-Croes durante un bunita ceremonia, a presencia e desvelo di borchi di e caya dedica na Dr. Jose Gregorio Hernandez na districto di Dakota.
E mainta aki a inicia cu palabranan di bonbini di señora Suzie Henricus, Fundador y President di Cas di Oracion Jose Gregorio Hernandez. Despues di e bunita palabranan di señora Henricus a sigui e desvelo di e borchi na honor di Dr. Jose Gregorio Hernandez.
Durante su discurso, Prome Minister a conta un tiki di e proceso pa a yega na e bunita dedicacion aki. Basta tempo pasa el a wordo acerca pa señora Suzie Henricus pa cambia e nomber di e caya. E mandatario a splic’e e tempo ey cu esaki ta un procedura largo y basta complica. Despues di esaki, señora Suzie, hopi determina a bin bek cu basta firma den apoyo pa su idea.
Prome Minister ta sigui bisa cu un cambio di nomber di caya tin hopi retonan administrativo cu e comision concerni mester tene cuenta cu nan. Na e momento ey e propuesta a bin dilanti na señora Suzie pa dedica e caya na honor di Dr. Jose Gregorio Hernandez en bes di cambia e nomber. Esaki ta un gesto sumamente bunita y ta un reconocimento pa loke e dokter a haci y loke cada un di nos ta reconoce cu el a haci y asina Aruba ta mustra mundo henter e aprecio pa e obranan di Dr. Jose Gregorio Hernandez.
“Mi ta gradici señora Suzie cu a cuminsa cu e proceso aki hopi aña pasa y a mustra su determinacion y no a laga nada strob’e y a mustra pakico un fiel devoto ta e miho persona pa lidera un proyecto asina. Danki pa a keda kere den e proceso”, Prome Minister a menciona.