ORANJESTAD – Diaranson 26 di juni Prome Minister Evelyn Wever-Croes a reuni cu Parlamento Hubenil di Aruba pa asina scucha e plannan cu nan ta trahando riba dj’e.
Pa Gobierno di Aruba ta hopi importante pa scucha e bos di nos hobennan. Parlamento Hubenil ta un stakeholder di Gobierno y semper ta tene cuenta cu e posicion cu nan ta trece dilanti. Na e momento aki nan ta den e proceso importante di scoge parlamentario- y ministernan hubenil nobo.
Prome Minister ya a haci e cita pa e siguiente reunion unda e parlamentario- y ministernan hubenil nobo lo trece nan vision dilanti y hunto cu e vision di Gobierno lo traha na e bienestar di nos hobennan na Aruba. Parlamento Hubenil ta un fundacion cu ya desde su inicio na 2003 ta haciendo cosnan grandi pa hobennan di Aruba y e ta un plataforma importante unda hobennan por desaroya diferente habilidad.
“E habilidad pa bira un lider den comunidad ta uno valioso pa e futuro di nos hobennan y den esey Parlamento Hubenil tin un papel hopi importante. Mi tin pleno confiansa den e grupo di hoben aki. E compromiso di nos como Gobierno ta pa prepara e pais aki pa nos hobennan tuma over den futuro. Mi ta gradici Parlamento Hubenil pa e reunion y pa trece puntonan dilanti cu ta importante desde perspectiva di un hoben y mi ta felicita nan pa e bon trabou y desea nan hopi exito cu nan proyectonan”, Prome Minister a expresa.
