Dialuna despues di atardi Minister Presidente representando Minister di Cultura hunto cu Ministerio di Cultura y Departamento di Cultura a haci un recorido den bus bishitando diferente actividad den bario relaciona cu Celebracion Dia di San Juan – Dera Gay. E prome celebracion cu a wordo bishita ta na Centro di Bario Savaneta, despues a sigui pa Sportboys Club, Centro di Bario Tanki Lendert y por ultimo Centro di Bario Playa Pabao.
Na tur evento tabata reina un dushi ambiente di San Juan, na unda tabata tin presentacion di musica, canto y baile. Na Centro di Bario Savaneta por a presencia un obra teatral di muchanan relaciona cu celebracion di San Juan – Dera Gay. Ademas tabata tin un reconocimento special na Sr. Herbert Alvaro Maduro, miho conoci como ‘Bebe’, kende ta un persona hopi stima den Savaneta y ta hopi dedica na su trabou di beheerder, di cual merecidamente ela bai cu pensioen.
Na Sportboys Club tabata tin presentacion di canto y musical di un Tipico, competencia y demostracion di Baile di San Juan y Baile di Bandera caminda nos muchanan y adultonan a participa. Minister Presidente Evelyn Wever-Croes tambe a duna un presentacion di Baile di San Juan.
Na Centro di Bario Tanki Lendert tabata tin otro celebracion cu tabata tin bon ambiente cu e.o. presentacion di Grupo Tipico, Baile di San Juan, Grito di Gay. Aki Minister President den nomber di Minister di Cultura a entrega dos reconocimento, uno na Sr. Francis Jacobs pa su carera artistico como musico y cantante pa mas di 50 aña manteniendo nos tradicion y cultura musical. E otro reconocimento a wordo entrega na Sr. Oslin Ismail, pa su talento como musico, cantante y compositor pa mas di 25 aña manteniendo nos cultura, tradicion y musica tipico. Ambos Baluarte cultural di Tanki Lendert y Tanki Flip a keda masha contento cu nan reconocimento.
Por ultimo a bishita Centro di Bario Playa Pabao na unda tabata tin presentacion di Rincon Boys y demostracion di Baile di San Juan pa grupo di muchanan y adultonan. E publico presente a disfruta di e bon presentacion di musica y canto.
Na tur e actividadnan Minister President a hiba palabra deseando un y tur un Feliz Dia di San Juan, Dera Gay, nos fiesta di cosecha. Ademas a gradici gradici un y tur cu ta haci nan esfuerso pa planta pa asina por cosecha. A gradici tur centronan pa organisa e Celebracion di San Juan – Dera Gay 2024 pa asina nos por a bini hunto pa disfruta di locual ta di nos, nos fiesta tradicional di cosecha. Danki pa biba nos cultura. Cultura bo tin cu bib’e y cu bo participacion nos ta engrandec’e.