Relaciona cu Celebracion di San Juan-Dera Gay, durante e periodo di 11 di juni pa 20 di juni Departamento di Cultura Aruba (DCA) den cooperacion cu Cas Tan Tin y Cuerpo di Bombero y Formacion Social, a organisa presentacion escolar educativo di nos fiesta tradicional di cosecha di Dia di San Juan- “Dera Gay”.
Un total di mas di 3800 mucha a haya e oportunidad pa experencia y educa riba e Celebracion, Cosecha y Baile Tradicional di San Juan. Na yegada e muchanan a ser ricibi y guia pa boluntarionan mientras den fondo e musica di San Juan ta ser toca. E personahe di Juan y Juanita a yama e muchanan bon bini na Cas Tan Tin y a conta un storia cortico di Fiesta di San Juan, unda a splica en cuanto tur elemento di e fiesta di San Juan. Tabata tin canto di cancionnan popular di temporada di cosecha y un demostracion di e baile di Dera Gay cu buscamento di e calbas, unda e muchanan di scol a participa y a saca un ganado.
Di parti Cuerpo di Bombero señor Francis Toussaint a trece dilanti cu tabata un tradicion pa cende candela durante e fiesta di San Juan, pero awo ta conseha pa no cende candela mas ya cu esaki ta peligroso y ta causa daño na nos medio ambiente y bestianan. Ademas den caso si ta cende candela, pa haci esaki responsabel y a conseha con pa atende cu esaki pa evita peliger. Despues a sigui cu e wega di pikimento di bandera y e mucha cu haya e bandera cora y geel, ta gana y ta ricibi un premio. Ademas tabata tin e competencia popular di e grito di gay y galiña, esun cu e miho grito di gay y galiña a ricibi un premio.
Tabatin un boluntario cu a disfrasa na e Gay animando e muchanan hunto cu un grupo di musico cu a duna presentacion en bibo durante e dos simannan di e presentacion escolar.
Na final di e presentacion e muchanan a ricibi un recorido den Cas Tan Tin y a haya un splicacion con nos antepasadonan tabata biba. E miembronan di Formacion Social a guia e muchanan di scol y na salida tur mucha a ricibi un boli pa refresca. Ademas scolnan a ricibi plachi di kleur pa e alumnonan.
Departamento di Cultura ta gradici Museo Cas Tan Tin, Departamento di Bombero, e agrupacion musical “Grupo Kakiña”, hobennan di Formacion Social y tur boluntario pa nan cooperacion cu a haci e presentacionnan escolar exitoso. Danki tambe na tur scol, alumnonan y docentenan pa nan participacion. Departamento di Cultura ta desea pueblo di Aruba un feliz Dia di San Juan “Dera Gay” 2024.