The Bottom – Riba 18 di juni 2024, Colegio di supervision financiero di Boneiro, Sint Eustatius y Saba (Cft) a bishita Saba. Ayanan, e Colegio a papia cu e Colegio Ehecutivo tocante di e desaroyo continua di maneho financiero y e desaroyo organisacional inicia. Ademas, a delibera tocante di e ambicionnan di Saba riba e tereno di – entre otro – siguridad di subsistencia y e desaroyo economico di e isla. E pagonan special cu frecuentemente ta forma parti di e ambicionnan aki, ta pone presion riba e presupuesto.
Durante su bishita, Cft a dedica atencion na e mehora continua di maneho financiero. A pesar cu ya caba for di 2014, Saba ta ricibiendo declaracionnan di auditor aprobatorio tocante di e cuentanan anual, maneho financiero y e desaroyo di e organisacion (financiero) tin prioridad riba e agenda di e Entidad Publico. Cft a papia cu e team di planificacion y control di e departamento di finanzas, y ta haya cu e pasonan cu a ser duna pa desaroya maneho financiero ta algo sumamente positivo.
Na 2023, Hulanda y Saba a cera un acuerdo di gobernacion. E acuerdo aki ta enfoca riba mehora di siguridad di subsistencia, desaroyo economico duradero, clima y naturaleza, y fortalecemento di bon gobernacion. Cft a delibera cu e Colegio Ehecutivo tocante di e progreso di e acuerdonan administrativo aki, y nan efecto riba e presupuesto. Un parti considerabel di e proyectonan ta ser financia for di e pagonan special, loke ta pone presion riba e presupuesto regular. Esaki ta debi na e hecho cu inversionnan, manera e construccion di e haf nobo, ta conduci structuralmente na gastonan mas alto pa maneho, mantencion y remplaso.
Pa finalisa e bishita, Cft a bishita algun proyecto dirigi riba e desaroyo economico duradero di e pais.