Philipsburg – Riba 14 di mei 2024, Sint Maarten a stipula e presupuesto pa 2024. Esaki ta casi seis luna despues di e deadline di 15 di december 2023. Colegio di supervision financiero Corsou y Sint Maarten (Cft) ta preocupa pa e calidad di e presupuesto, y ta urgi e pais pa reconcilia esaki mas pronto posibel cu e normanan stipula den Ley di Reino Supervision Financiero Corsou y Sint Maarten (Rft). Asina a stipula e modificacion presupuestario aki, e pais por contrata un prestamo pa e inversionnan necesario.
Cft tin añanan largo ta expresa su preocupacion tocante di e retraso structural cu tin den e entrega di e presupuestonan stipula. Debi na e desaroyonan politico reciente, e proceso presupuestario pa 2024 ta keda ainda mas atrasa. Actualmente, e pais ta trahando riba un modificacion presupuestario pa 2024. Cft ta enfatisa e importancia di finalisa e proceso aki mas pronto posibel. Ademas, e pais mester implementa e plannan di enfoke redacta anteriormente, pa mehora di e proceso presupuestario. Lo mester prepara e proyecto presupuestario 2025 na tempo.
Prestamo pa inversionnan
Na 2024, Sint Maarten kier contrata un prestamo pa construccion di un prizon nobo y trabaonan di mantencion di careteranan. Tanten cu e presupuesto 2024 no ta cumpli cu e normanan di e Rft, e pais no por contrata prestamonan mediante e inscripcion coriente cerca Hulanda. Cft a pidi Sint Maarten pa entrega un modificacion di proyecto presupuestario cu ta cumpli cu e normanan aki prome cu 1 di juli 2024.
Reformanan Servicio di Impuesto
Cft ta considera di sumo importancia cu ta modernisa e sistema di impuesto y e Servicio di Impuesto di Sint Maarten. Actualmente, e Servicio di Impuesto ta lucha cu escasez di personal y problemanan operacional grandi. Entre otro pa e motibo aki, e ingresonan di impuesto ta menos, compara cu e crecemento economico. Cft ta anticipa cu e pais lo por aumenta significantemente e ingresonan di impuesto riba termino cortico. Den e marco ey, Cft ta enfatisa cu ta importante pa Servicio di Impuesto y sobra instancianan, manera Audit Team Sint Maarten, pa tene mas controlnan. Na momento cu e realisacion di ingresonan di impuesto ta bira mas alto, Sint Maarten lo tin mas espacio den e presupuesto pa iniciativanan (di maneho) y inversionnan nobo.
Fondonan di cuido y fondonan social
E deficitnan cerca e fondonan di cuido y fondonan social ta aumenta. Pa e periodo 2024 te cu 2030, e pronostico di Uitvoeringsorgaan Sociale en Ziektekosten Verzekeringen (SZV) ta mustra ANG 174 miyon na deficitnan adicional cerca e fondonan di cuido. Te awe, Sint Maarten no a implementa suficiente reformanan pa reduci structuralmente e deficitnan aki. Si e pais no ta tuma medidanan, Cft ta anticipa cu riba termino largo, esaki lo tin un impacto grandi riba e presupuesto nacional di Sint Maarten.