Ministerio di Infrastructura y Maneho di Awa (IenW) ta preparando un cambio di e Ley di Aviacion BES. E cambio aki ta crea un base legal pa institucion di un obligacion di servicio publico riba cierto ruta aereo. Te cu 26 di juli tur hende por reacciona riba e proposicion di ley.
Cu e cambio di ley propone ta haci posibel cu minister di IenW por institui un obligacion di servicio publico (public service obligation, PSO) riba cierto ruta specifico den Hulanda Caribense y entre e islanan di Hulanda Caribense y e otro partinan di Reino. Es decir cu den futuro, pa medio di un areglo ministerial, minister por pone condicionnan pa companianan aereo cu ta bula riba un ruta di transporte aereo specifico. E condicionnan aki ta por ehempel preis maximo pa pasashi, cantidad minimo di vuelo, cantidad stipula di stul pa vuelo y garantia di continuidad di vuelo. Tambe e minister por scohe pa selecta un compania di aviacion pa medio di destaho, pa ehecuta e vuelonan aki.
Bon accesibilidad
Institucion di un obligacion di servicio publico por contribui na bon accesibilidad di e entidadnan publico na Hulanda Caribense. E espectativa ta cu e enfoke na prome instante lo ta riba e coneccion entre Sint Maarten y Saba/Sint Eustatius. E islanan aki ta depende pa nan accesibilidad pa gran parti di coneccion aereo cu Sint Maarten. E entidadnan publico y habitantenan ya pa algun tempo caba ta urgi pa drecha nan accesibilidad. Esaki ta importante pa desaroyo economico y social y ta haci por ehempel institucionnan educativo y hospitalnan miho alcansabel.
Consulta
E prome paso ta awor consulta riba e proposishon di ley. Ta te ora e ley drenta na vigor numa, ta posibel pa institui un PSO. E ora ey mester busca financiamento p’e ainda tambe. Riba esaki e gabinete nobo lo mester tuma un decision den futuro.
Pa mas informacion y pa reacciona riba e proposicion di ley tur hende por acudi te cu 26 di juli riba Overheid.nl | Consultatie Wijziging Luchtvaartwet BES voor grondslag openbaredienstverplichting (internetconsultatie.nl).