Recientemente den sala di operacion na Horacio Oduber Hospital (HOH) a eherce un operacion di un aneurisma den cerebro di un pashent. Un operacion cu nunca antes a wordo ehecuta na Aruba, y esaki a logra danki na e cooperacion cu HOH tin cu e departamento di neurocirugia di UMC Urecht. E diagnostico a ser haci pa HOH su neurologo, dr. Ivonne van Sijtveld hunto cu e team di profesional na HOH. Y e neurociruhano vascular Prof. Bart van der Zwan di UMC Utrecht a ehecuta e operacion aki hunto cu e team di profesional di sala di operacion. E operacion aki ta demostra cu HOH ta conta cu profesionalnan bon prepara y capas pa brinda e tipo di cuido asina, pero tambe cu ta conta cu e materialnan necesario pa por eherce un operacion specialisa.
E diagnostico
“E pashent aki a yega Departamento di emergencia na e momento corecto. El a presenta na hospital cu hopi dolor di cabes y nausea. E nivel di ta consciente di e pashent tabata basta bon. Mirando e caracteristicanan di e pashent a opta pa haci un e asina yama test CT Angiografia cu ta un di e miho testnan pa por haya un diagnostico den e caso aki. A traspasa e pashent pa departamento di cuido intensivo (ICU) y ora a haya resultado di e testnan haci aki a constata cu e pashent tabatin un asina yama “broken aneurysm,” dr. Sijtveld ta conta.
Un aneurisma hopi biaha ta dificil pa detecta y pues dr. Sijtveld ta hopi contento con tur cos a cana pa cu e caso aki y e tremendo cooperacion entre tur profesional na HOH pa a logra yega na e deteccion y sigui pa e operacion.
E operacion
Prof. Bart van der Zwan, neurociruhano vascular di UMC Utrecht a indica cu na HOH por nota cu tin hopi hende yena cu entusiasmo y profesionalismo. Esaki sigur tabata e caso na momento cu mester a opera un pashent cu a diagnostica un aneurisma den su cerebro. Un pashent cu tabata luchando pa su bida y nos a logra salb’e. “A enfoca pa haci e operacion aki di inmediato pasobra e pashent tabata birando pio,” tabata palabra di Prof. Bart van der Zwan.
Na Aruba ainda nunca a yega di efectua e tipo di operacion aki, pero si HOH tabatin tur e aparatonan y material necesario pa por a opera e pashent. Un operacion bastante complica y a logra ehecuta esaki cu exito. Despues di operacion, ainda tin e proceso di recuperacion y awe algun siman despues por menciona cu e pashent a regresa su cas y ta den bon salud.
E cooperacion
“Esaki ta demostra un bes mas cu trabou den ekipo ta hiba na exito y e cooperacion cu HOH tin cu UMC Utrecht y e departamento di Neurocirugia ta di sumo importancia paso e ta yuda na eleva calidad di cuido y conocemento di nos profesionalnan. Si no tabata pa e colaboracion aki, e chens cu a pashent aki lo por a fayece ta hopi grandi”, asina Jacco Vroegop, Director di HOH, a expresa yena di gratitud.
FIN