ARUBA TA PIKI UN PUNTO DEN CLASIFICATORIA PA MUNDIAL

Aruba a cuminsa e wega contra Saint Lucia, hopi bon, cu un wega mas ofensivo compara cu diasabra ultimo. Na di 21 minuut Aruba ta bai ariba pa medio di un goal di Walter Bennett y na di 43 minuut e score ta bira 2 – 0 pa medio di un penalty cobra pa Isai Marselia. Pero net prome cu halftime Saint Lucia ta corta ventaha. Despues di halftime Saint Lucia a cuminsa pone mas presion, y na di 67 minuut Saint Lucia ta empata e wega.

Por a nota cu e efectonan di cansancio despues di, a hunga diasabra y despues viaha pa Barbados a hunga un rol den e di dos tempo. Saint Lucia cu tabata na Saint Lucia pa mas cu un siman caba y riba dje tabata tin 2 dia mas di descanso a domina e di dos mitar, pero Aruba/ a sa di wanta e score na 2 -2 , vooral danki tambe na bon trabao di e arquero Mathew Lentink. Cu e resultado di awe e standing , despues cu tur team tin 2 wega hunga ta Corsow cu 6 punto, sigui pa Haiti cu tambe tin 6 punto, sigui pa Saint Lucia y Aruba, ambos cu 1 punto y na ultimo lugar Barbados cu 0 punto.

E proximo compromiso di seleccion di Aruba lo ta September ora cu den cuadro di e Concacaf Nations League, lo enfrenta e equipo di Saint Maarten y esun di Puerto Rico.