ORANJESTAD, Aruba – Aruba Hotel & Tourism Association (AHATA) ta apoya educacion na San Nicolas cu un donacion di AFL 25.000 pa Sociaal Fonds Colegio Nigel Matthew (SFCNM). E contribucion ta forma parti di e esfuerzonan continuo di AHATA pa inverti den preparacion di Aruba su forsa laboral.
E donacion a ser presenta pa presidente y CEO di AHATA, Sra. Tisa LaSorte, na presidente di e fondo social, Sra. Magaly Maduro, y miembro di e directiva, Sr. Nigel Matthew. E fundacion tin como mision pa yuda hobennan enfrentando limitacion financiero cu e fondonan necesario pa finalisa nan estudio secundario na Colegio Nigel Matthew na San Nicolas.
Sra. LaSorte a resalta e importancia di e fundacion su trabou, y ta contento cu e contribucion lo ta un inversion den e futuro di studiantenan di San Nicolas, brindando nan cu un miho oportunidad pa desaroya nan mes den un ambiente di estudio cu ta cultiva e potencial di tur alumno.
AHATA ta keda firme den nan planes pa sigui colabora cu skolnan na Aruba y dedica recursonan na un educacion mas accesibel, asina creando mas impacto positivo den e preparacion di nos hobennan y di nos futuro forsa laboral.