ORANJESTAD: Diahuebs anochi den un esfera festivo, a tuma luga entrega di diploma di e General Education Development (GED) program na e graduadonan di International School of Aruba. Minister Endy Croes tabata presente na e ocasion special aki. A inicia e ceremonia oficial cu e himno di Aruba canta pa Sra. Mirugia de Cuba, sigui pa discurso di director di International School of Aruba dr. Kelly Kramer. Minister di Enseñansa Endy Croes a duna un discurso felicitando e graduadonan y a haci entrega di diploma na e graduadonan. E aña aki GED tin un total di 29 graduado, di cual 16 tabata presente pa ricibi nan diploma. E miho graduado di e GED program ta Sr. Liram Tromp y e “Impact Graduate” ta Sr. Vandel Warner. Manera ta conoci, mayoria estado di Merca y provincia di Canada ta ofrece programa GED, cual ta un alternativa pa e adultonan cu no por a finalisa scol secundario di e forma tradicional. Tambe e ta brinda oportunidad na hoben bou di 16 y 17 aña bou di cierto circunstancia. GED a desaroya originalmente na aña 1942 como un alternativa util y viabel pa e militarnan cu a wordo manda den exterior pa lucha den guera prome cu nan a finalisa scol secundario. Desde e tempo ey, mas di 20 miyon persona a pasa e test durante mas di 75 aña di existencia di e programa. Desde aña 2017, International School of Aruba hunto cu Ministerio di Enseñansa di Aruba a inicia e programa GED cu exito, unda cu ta ofrece esnan cu no a termina scol secundario e alternativa pa finalis’e y haya un diploma. E diploma aki ta habri porta pa e studiantenan por sigui cu un estudio na un Junior College y/of College na Merca of Canada pa sigui desaroya nan mes. E mandatario di Enseñansa ta gradici International School of Aruba y e team cu ta organisa e programa GED y e mayornan pa sostene nan yiu durante e trayecto aki Por ultimo, e mandatario di Enseñansa ta felicita tur graduado cu nan logro. Alabes, ta desea nan hopi exito den futuro. “Mi ta orguyoso di boso nan”, Minister Endy Croes a finalisa.