Probablemente relaciona cu e videonan circulando riba Medionan Social den cual por a mira varios abuso/maltrato y negligencia, dos persona di e creche na Wayaca a wordo deteni caba dos siman pasa.
Diamars durante dia por a mira varios video y por scucha voicenotenan cu a wordo gepost riba medionan social(Facebook), riba e videonan aki por a mira con leidsternan di e creche/peuterschool Pasa Dushi Pasa Pret na Wayaca tabata abusa fisicamente y verbalmente di e criaturanan di cual nan mayornan cu confianza tabata paga e speelschool/creche pa nan yiunan por keda mita of full dia na dje. E ta algo horibel y increibel, pasobra e mayornan cu pleno confianza ta laga nan yiunan na un speelschool/creche pa asina por bay traha trankilamente y no por a pensa cu nan yiunan tabata wordo maltrata/ neglicia, cera den un baño, ta wordo gedal cu slof, ta wordo gespuit cu awa.
Diabierna atardi dia 31 di mei, despues cu tur mayor a busca nan yiunan na e creche/speelschool aki, autoridad a drenta e speelschool/creche aki y a detene dos persona, tambe a confisca varios articulo entre otro tur telefon.
Esaki a wordo haci hopi keto y e caso tristo aki ta den man di Husticia y ta bou investigacion. Na e momentonan aki Ministerio publico no por duna mas informacion.
Aki ta trata di un caso hopi tristo pa motibo cu ta trata di criaturanan inocente cu no por papia y mucho menos defende nan mes. Na maart 2022 e baby Noah di apenas 4 luna a perde su bida na e creche aki. Awo a sali na cla tambe cuanto abuso ta pasando cu e criaturanan na e creche aki.
Esaki ta un creche di cual e abusonan cometi pa e leidsternan a sali na cla, pero no por bisa si tin mas creche/speelschool caminda abusonan tambe por ta pasando. Mayornan mester pone bon tino unda y cu ken nan ta laganan yiunan chikito y si acaso mira algo cu por ta parce abuso, porfabor raporta esaki di biaha na autoridad of na un di e fundacionnan cu ta contra abuso di mucha.
Spera cu pronto Husticia lo por sali duna mas informacion tocante e caso tristo aki.