Home » DIA MUNDIAL DI SIGURIDAD PA CONSUMO DI ALIMENTO, 7 JUNI 2024

DIA MUNDIAL DI SIGURIDAD PA CONSUMO DI ALIMENTO, 7 JUNI 2024

by Admin
0 comment 61 views

 

 

 

BACKGROUND

20 december 2018 Asamblea General di Nacionan Uni a adopta resolucion 73/250 proclamando Dia Mundial di Siguridad pa Consumo di Alimento (World Food Safety Day) y entrante 2019, 7 di juni lo celebra benificionan di alimento cu ta conta cu norma di higiena, sanidad y siguridad den nan produccion y preparacion. Dia Mundial di Siguridad pa Consumo di Alimento ta sirbi pa:

  • haci hende conciente di tema cu ta concerni higiena, sanidad y siguridad den produccion y preparacion di alimento
  • demonstra con pa preveni malesa aplicando medida pa garantisa un produccion y preparacion higienico, sano y sigur di alimento
  • discuti enfoke colaborativo pa mehora higiena, sanidad y siguridad den produccion y preparacion di alimento den tur sector concerni
  • promove solucion y forma pa haci alimento mas sigur pa consumo


TEMA PA 2024: Siguridad pa Consumo di Alimento: Prepara pa lo inespera

Riba Dia Mundial di Siguridad pa Consumo di Alimento, nos ta recorda cu siguridad pa consumo di alimento ta un responsabilidad colectivo- tur hende di productor te cu consumidor mester hunga nan papel. Esaki ta e unico manera cu nos por asigura cu e alimento riba nos tayo ta sigur pa consumo.  Sinembargo por tin situacion excepcional, den cual no obstante nos tur asumi nos responsabilidad por surgi lo inespera y siguridad pa consumo di alimento ta keda comprometi.

Ainda asina, semper tin algo cu nos por haci pa evita malesa. Bo ta prepara pa lo inespera?

Incidente di siguridad pa consumo di alimento por varia di un evento menor te cu un crisis mayor internacional, sea a causa di un interrupcion di coriente prolonga local, un intoxicacion alimentario  na un restaurant local, un retiro voluntario di productonan contamina pa e fabricante, un brote genera pa productonan importa of un desaster natural.

Peliger pa siguridad pa consumo di alimento no conoce frontera, y den un suministro di alimento global mas y mas interconecta, riesgonan plantea pa alimento no saludabel por rapidamente escala di un problema local pa un emergencia di alcance internacional.


Kico lo por haci pa prepara pa enfrenta incidente cu ta afecta e siguridad pa consumo di alimento?

Gobiernonan por:

    • Compromete pa desaroya of actualisa programa di emergencia pa siguridad pa consumo di alimento
    • Reforsa sistemanan nacional di control di alimento
    • Incrementa e capacidad di vigilancia y coordinacion
  • Mehora e comunicacion cu empresa alimentario y e publico en general

Empresa alimentario por:

    • Mehora plan di maneho pa siguridad pa consumo di alimento
    • Comparti experiencia y “lessons learned” y traha den forma colaborativo
  • Mehora e manera di comunica cu e consumidornan

Consumidornan por:

  • Asigura pa sa con ta raporta of responde na incidente di siguridad di consumo pa alimento
  • Asigura cu nan ta compronde e implicacionan di lo inespera na cas y con pa reacciona


Impacto di cambio climatico riba siguridad pa consumo di alimento

Cambio climatico tin multiple impacto riba e siguridad pa consumo di alimento, directo y indirecto, y ta menasa salubridad publico. Cambio den patronchi di awacero, tempo, aumento di temperatura averahe annual y evento di tempo extremo lo afecta den forma no uniforme diferente region productor di alimento, cu impacto negativo riba siguridad alimentario mas tanto den paisnan den desaroyo y tambe nutricion. Dos factor principal, temperatura y humedad ta causa entre otro:

  • modificacion di e contaminacion di awa y alimento pa patogeno bacterial y viral, cual ultimo ta cambia den nan forma di sobrebibi y transmision. 
  • cambio den incidencia y crecemento di fungi (schimmel) y formacion di micotoxina. Micotoxina ta ser produci pa cierto fungi riba cultivo manera trigo, maishi, aros y por causa efecto toxico agudo y malesa cronico den tanto ser humano como animal di cria.
  • expansion di algal blooms den lago y oceano, interactuando cu nutriente di origen agricola of awa (no purifica) di riool, afectando ecosistema y especie marino pa consumo humano.
  • un riesgo halto di zoonosis (malesa transmiti di animal pa ser humano) emergente, cambio den sobrebibencia di patogeno y alteracion di malesa transmiti via vector (p.e. sangura) y parasito den animal, lo cual por necesita un aumento di medicacion veterinario, cu posibel aumento di nivel residual den producto di origen animal. Esaki no solamente ta presenta posibel riesgo agudo y cronico pa salud humano, pero tambe ta ser relaciona cu un aumento den resistencia contra medicamento antimicrobial pa patogeno den ser humano y animal. 
  • un posibel aumento di uso di pesticida y consecuentemente nivel residual den producto agricola ora sistema di agricultura ser adapta na e creciente problema di plaga y especie invasor cu ta menaza cultivo, causa dor di cambio climatico. 

 

Subida di temperatura ta aumenta (1) presencia di parasito den pisca y planta di awa dushi, (2) fungi afectando maishi y trigo, (3) salmonella den galiña, (4) bacteria di genera Vibrio den mariscos (un “flesh eating bacterium”). Aumento den humedad y awacero por aumenta contaminacion di lechuga, alfalfa, celeri, ciboyin cu E.Coli y Salmonella y via aerosol contaminacion di tomati cu Salmonella.

E problema mayor ta fungi y micotoxina, generalmente di genera Aspergillus, Fusarium, Penicillum y Alternaria. Fungi micotoxigenico ta afecta maishi, aros, noot, koffie, cereales, fruta seca, specerij, cultivo pa cria di bestia, fruta y berdura.

Union Europeo mediante e European Food Safety Authority a saca un rapport titula “Climate change as a driver of emerging risks for food and feed safety, plant, animal health and nutritional quality” riba e problema di cambio climatico riba e siguridad pa consumo di alimento.

Food and Agriculture Organization (FAO) den e rapport “Climate Change: Unpacking the burden on food safety”  a documenta e problema pa por establece un programa di accion.

 

SITUACION NA ARUBA

Sector di servicio di alimento (restaurant, takeaway, snacktruck, catering, servicio di entrega) y tur persona, empresa encarga cu produccion y preparacion di alimento mester aplica regla stipula pa ley, cu ta ser controla, pero pa benta di alimento den supermercado siguridad pa consumo di alimento no ta regla pa alimento daña of fecha di expiracion pasa. Y no tin claridad pa producto agricola local bendi den supermercado, con pa confirma cumplimento cu standard necesario..

Gobierno mester adopta un maneho combinando siguridad alimentario, salud di planta y siguridad pa consumo di alimento pa sigura calidad, siguridad y disponibilidad di alimento nutritivo na Aruba.

 

PA MEDIONAN DI PRENSA EN GENERAL

Pa mas informacion, tuma contacto via telefon na 7478280 of via email [email protected].

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio