ORANJESTAD | Despues di casi cuater aña y mey manera Director Ehecutivo na PFTSA, Pension Fund Tourism Sector Aruba, Marion Agunbero ta retira lagando Pension Fund Tourism Aruba den man di Natalia Lacle, cumisando 1 di juni 2024. Desde cu el a join PFTSA na 1 di november 2019, Agunbero a traha hopi di cerca cu miembronan di e hunta ehecutivo, coleganan na oficina, y e fondo su tanto stakeholders.
Mientras cu el a eherce su rol, Agunbero a enfoca riba desaroya e organisacion cu un update, implementacion di un structura di ‘good governance’ di cual tres diferente comision a keda introduci e tempo ey. Esaki tabata pa facilita e proceso di inversion, audit y Risk & Compliance. PFTSA despues a apunta Compliance & Risk Officers asigna pa monitoria e areanan aki den un esfuerso continuo pa sigui cumpli cu rekesitonan regulatorio.
Cu e asistencia di conseheronan externo, varios beleid y procedura a keda implementa y mehora. Durante e tempo aki, e reto di mas grandi pa PFTSA tabata e pandemia, cual tabata tin un impacto grandi riba economia di Aruba y sector financiero den su totalidad. Accion inmediato a keda tuma pa asina e fondo por wanta e presion aki y salbaguardia su posicion financiero, manteniendo su mes consistente riba e rekesitonan regulatorio rekeri. Despues di pandemia, PFTSA a emplea mas hende y upgrade nan structura salarial, aumentando e nivel di profesionalismo y personal di fondo.
Agunbero ta raporta cu den cooperacion cu otro companianan di pension na Aruba, PFTSA a tene varios discusion largo cu Banco Central y otro entidadnan gubernamental pa elimina cierto beleid sectoral pa habri e mercado di pension na un nivel mas ‘playing field.’ Bao e liderazgo aki, desde 2019, PFTSA a mira un crecemento satisfactorio di 1,930 participante cu a join e fundo representa pa 30 compania local.
Awe PFTSA ta opera a base di un Strategic Investment Policy cual ta e base di su beleid actual di inversion, guiando tur otro decision di inversion. E plan strategico di 2024-2026 tabata aproba pa e hunta ehecutivo anto implementa. E plan ta set e vision pa un fondo den e siguiente añanan. “Mi ta hopi sigur cu PFTSA su team actual lo sigui haci un tremendo trabao den guia e fundo y provee servicio personal, profesional y amabel na miembronan, bao direccion di Natalia Lacle, “ segun Agunbero.
Lacle a join e fondo na october 2020 como un Pension Manager. E ta trece cu ne un background bastante robusto den loke ta seguro hunto c’un fundacion educacional y conocemento amplio den loke ta institucionnan, specialisa den Risk Management, Compliance y mucho mas. Posicionando su mes manera un lider ideal p’e organisacion di PFTSA, sigurando un transicion ameno entre e directornan ehecutivo saliente y esnan cu ta bini awor na funcion.
PFTSA a host nan General Assembly anual den forma di un Zoom meeting invitando tur miembro di PFTSA pa sign-in digitalmente. E meeting tabata lidera pa ambos directornan ehecutivo saliente y esnan actual, Marion Agunbero y Natalia Lacle, modera pa Shrayelle Giel.
PFTSA a wordo funda na 1992 manera un iniciativa di Aruba hotel and Tourism Association y sindicato FTA, mirando cu ambos tabata comparti e mesun vision den loke ta e necesidad pa crea un plan di pension cu lo brinda trahadonan den industria di turismo un entrada adicional despues di retira, riba di e pension general di biehes brinda pa gobierno.