Alfonos Mirep tabata e ultimo sobreviviente di e prome 8 muchanan cu a gradua cu diploma di M.U.L.O. na Aruba. E logro aki no tabata facil. Nan mester a traha duro y milagrosamente tur e candidatonan, studiante na Juluianaschool, a pasa e examen final cu exito. Mi kier duna homenahe na Alfonso Mirep cu e storia tras di e logro aki.
Actualmente e edificio aki ta funciona como sede di Algemene Rekenkamer. Un tempo e tabata oficina di Sr.
Ramon Lee, Minister di Cultura, Labor y Deporte. Algun hende ta cord’e di tempo e tabata Biblioteca Nacional. Tin
algun ta bay bek mas leu y nan ta corda tempo Prinses Margrietschool tabata ubica ey den (1943-1953). Solamente e
mas bieunan di nos hendenan sa cu e edificio aki originalmente tabata e prome scol di gobierno na Aruba cu eventualmente a haya nomber di Juliana School na 1921.
Na aña 1920 "Scol di Gobierno” a bira ULO, (Uitgebreide Lager Onderwijs) di 8 klas. Na 1921 e nomber a cambia pa Julianaschool, pero el a keda ULO te Januari 1939 cu esistema MULO a keda implementa. MULO (Meer Uitgebreide Lager Onderwijs) di 10 klas na Aruba a bira un necesidad cu mester a wordo atendi hopi prome. Na Corsow ya nan a implementa e pakete nobo. Un di e voznan fuerte pa bin cu MULO na Aruba tabata di Sr. Gustaf Kuiperi, redactor di e semanal La Verdad y
un miembro fundador di Club Rotario di Aruba. Sr. Kuiperi a biba p’afo di Aruba hopi aña y ora el a bolbe el a nota cu progreso di Aruba lo keda stagna si no amplia educacion. Tambe tabatin caso di ambtenaarnan colonial cu tabata nenga di
bin Aruba pasobra ta educacion di ocho klas so tabatin pa nan yiunan. Na aña 1937 e decision a cay. Julianaschool ta cuminsa pakete di MULO na 1939 y e prome examen lo tuma luga na 1940.
Cuminsando na Januari 1931 usando griffel pa scirbi riba lei, dia 14 di december di 1940 tur ocho a
slaag y nan a haya e prome diplomanan di MULO na Aruba. Nan tabata Ellen Raven, Lydia Ponson, Erna Ponson, Shirley Harms, Carol Leon, Ersilia “Chia” Gonzales, August “Tico” Kuiperi y Alfonso Mirep.
Diversidad di graduadonan. E prome grupo cu a logra nan MULO diploma na 1940 tabata un refleho di e diversidad di pueblo di Aruba.
Cu excepcion di e rumannan Ponson, tur di e grupo tabatin sea tata of mama stranhero; Venezolano, Colombiano of Americano. Shirley Harms a nace na Merca. Den e grupo tabatin catolico, protestant y hudiu . Probablemente como cu Guera Mundial II a cuminsa na Europa y Peter Stuyvesant College na Corsow no a habri ainda, ningun di e grupo a bay sigui studia afo. Carole a bay Merca pa tuma les di secretario y despues a bolbe y traha pa e Commanding Officer di ehercito Mericano staciona aki durante Guera Mundial II. Algun di e otronan a desaroya nan mes aki mes.
Cu casi mil programa di “Showtime” y su otro programa “Ripiti y Gana”, Tico Kuiperi a bira e presentado di television mas conoci y popular di Aruba. Tico tambe a transmiti weganan di baseball na radio durante casi 30 aña.
Lydia Ponson tabata man drechi di cuater diferente notario y probablemente tabata suficiente prepara pa bira notario e mes. Erna Ponson a casa cu Erwin Oehlers y nan a bay biba na Hulanda.
Ellen Raven a dedica su mes na hopi actividad civico y cultural. Na 2009 Ellen a cumpli 50 aña como miembro di directiva di Protestantse Christen Vrouwen Bond! Ellen a ricibi condecoracion real pa su obranan humanitario.
Shirley Harms a bay Merca na 1944 y a join Women’s Army Corps. Na final di guera mundial el a bay Hapon cue ehercito di ocupacion y despues el a wordo traslada pa ataché militar Mericano na Rio de Janeiro. Hopi aña despues, na edad di mas di 50 aña, Shirley a obtene su Bachelors Degree na Universidad di Connecticut den Literatura Ingles.
Alfonso Mirep a bay traha cu su tata y eventualmente a tuma rienda di e negoshi La Venezolana.
Cu e morto di Alfonso Mirep, e ultimo sobreviviente di e klas di 1940, tur ocho a pasa pa Scol Eterno.