𝗠𝗲𝗮𝘀𝗹𝗲𝘀, 𝘂𝗻 𝗺𝗲𝗻𝗮𝘀𝗮 𝗴𝗹𝗼𝗯𝗮𝗹 𝗰𝗿𝗲𝗰𝗶𝗲𝗻𝗱𝗼!

Departamento di Salud Publico di Aruba a bin ta monitor di cerca e desaroyo tumando luga na Europa, Merca y recientemente den Caribe riba e casonan di transmision di e virus di Measles.

Measles of manera nos ta yam’e “Sarampi” ta un malesa altamente contagioso cu ta wordo causa pa un virus. E virus aki ta transmiti su mes hopi facil na momento cu e persona infecta ta tosa of nister. E malesa por ocasiona complicacion severo y asta morto.
Prome cu introduccion di e vacuna contra Measles na mundo den aña 1963 tur aña un cantidad grandi di mucha particularmente bou di 5 aña tawata fayece aconsecuencia di e malesa aki. Desde introduccion di e vacuna contra Measles e casonan di Measles a baha considerablemente rond mundo y na Aruba desde su introduccion na aña 1979 nos no a mira e malesa aki mas desde decadanan 80, danki na e grado di vacunacion halto (95%) bou di nos muchanan entre edad di 0 cu 10 aña.

Pero ta recientemente cu World Health Organization (WHO) a bati alarma atrobe pa aumento den casonan di Measles tumando lugar den diferente pais di Europa (40 pais) y USA (18 estado) bou tanto mucha como tambe adulto. Organisacionan di salud ta di opinion cu e brote di Measles ta tumando lugar debi na reduccion den grado di vacunacion particularmente despues di e Pandemia di COVID. Mas persona dicidi cu nan no ta vacuna nan yiu contra Measles, mas e grado di vacunacion dentro di e pais ta baha ocasionando e posibilidad pa e virus transmiti su mes atravez di esnan cu no ta vacuna pero tambe esnan mas vulnerabel ta bira mas grandi.

Manera nos a informa Departamento di Salud Pubico a bin ta monitor e desaroyo mundial aki di cerca y a cuminsa reuni tambe cu diferente partners pa cuminsa traha riba un plan pa mitiga of reduci e posibilidad cu Aruba lo por experencia un brote di Measles. Mescos cu e virus di COVID ta imposibel pa nos evita e virus di drenta nos pais pero ta importante pa internamente nos pais ta bon prepara pa maneha su transmicion ora esaki e drenta y alavez ofrece proteccion na e grupo di ciudadanonan mas na risico di bira hopi malo of asta fayece si nan bin den contacto cu e virus.

Den e siguiente dianan DVG lo bay ta informando comunidad mas riba e desaroyonan rond di e virus aki y e pasonan cu Aruba ta tumando pa prepara pa cu esaki.

Pa mas informacion:
✅Like nos Facebook page Directie Volksgezondheid DVG Aruba
✅Follow nos riba Instagram directie_volksgezondheid_aruba
✅Subi nos website www.dvg.aw
✅Yama nos na 2800101/5224200
✅Mail nos na [email protected]

#DVGAruba