ORANJESTAD –Dialuna ta e dia cu Procurador General ta bisa Hof di Corte Superior kico e ta pensa di e apelacion di e acusadonan den caso Avestruz.
ARUBA NATIVE por a compronde cu dialuna tambe tin e caso di kita propiedadnan di Benny Sevinger relaciona cu caso Avestruz.
DIALUNA LO HAYA SA CASTIGONAN DI CASO AVESTRUZ
Dialuna Procurador General ta bisa Hof di Corte Superior, kico e ta pensa di e acusadonan cu a apela nan sentencia y ki castigo e ta exigi pa nan. Segun e planeamento di Hof, esaki lo bay ta den careda di 11’or di mainta. Posiblemente e mesun dia, algun abogado lo hiba defensa aunke cu abogado mr. Oomen for di siman pasa a pidi Hof pa e hiba defensa Diamars pasobra e kier studia e requisitorio di Procurador General pa reacciona ariba.
CASO KITA PROPIEDADNAN DI SEVINGER
Dialuna mainta, Corte di Husticia den Promer Instancia ta cuminsa cu tratamento di e caso cu Ministerio Publico a cuminsa contra Oslin Benny Sevinger pa kita propiedadnan, relaciona cu caso Avestruz.
Ora cu Ministerio Publico a cuminsa cu tratamento di e caso Avestruz den Promer Instancia, Fiscal a anuncia cu lo cuminsa un caso di kita propiedadnan pasobra ta sospecha Benny Sevinger di labamento di placa. A menciona suma di mas o menos 1 Miyon Florin.
Dialuna lo no bay trata e caso sino lo bay planea un fecha pa e tratamento. Tambe e abogadonan di Sevinger lo por pidi pa haci investigacion cu nan kier pa tuma lugar promer cu e tratamento cuminsa. Despues di e parti aki lo bay palabra un fecha pa cuminsa cu tratamento di e caso.