ORANJESTAD – Dialuna ultimo a habri cu e bon noticia cu desempleo a yega e cifra record di 4%. E porcentahe aki ta esun di mas abou den historia di pais Aruba, y ta danki na e iniciativanan di Gabinete Wever Croes pa cu e mercado laboral.
Minister di Labor Glenbert Croes cu hopi orguyo a trece e noticia aki na comunidad. E mandatario a splica cu desde inicio di gobernacion di Gabinete Wever-Croes, Gobierno a pone e mercado laboral como un prioridad, mirando e cifra halto di desempleo cu tabatin. Awe e cifra di 4% ta un indicacion cu Gobierno ta creando cupo di empleo pa nos hendenan.
Feria Laboral pa Hobennan
Tambe, e mandatario a anuncia di lo ta organisando un “jobfair” pa e hobennan entre 16 pa 24 aña. Ministerio di Labor a lanta un “special taskforce” pa asina comunica cu e tres hotelnan sigurando cu nan lo duna preferencia na nos hobennan local pa loke ta cupo di empleo. E “special taskforce” aki ta presidi door di Sabine de Groot di EPE, Sarah Hardeveld di DPL y Nataly Arends di Ministerio di Labor.
Pa Gobierno ta importante pa e hobennan sigui studia, ya cu pa nan esaki lo habri posibilidadnan infinito pa empleo. Pero pa esnan cu a scohe pa subi e mercado laboral na un edad hoben, EPE ta duna nan e posibilidad di engrandece nan conocemento tumando cursonan necesario pa subi e mercado laboral exitosamente.
Feria Laboral pa 45+ y Pensionadonan
Dunando oido na e kehonan cu Minister Glenbert Croes ta ricibi di nos hendenan cu no ta hayando trabou pa motibo di nan edad pero como tambe nos pensionadonan cu kier sigui traha, e mandatario a anuncia tambe di lo ta organisando un feria laboral pa e categorianan aki di edad. Aruba, comercio, mester di trahado. Nos adultonan hoben y mayor kier traha. Pues nos ta bay trece e dos gruponan aki hunto, esta Comercio y e grupo cu ta buscando trabou, pa asina di e forma aki tambe 1. cumpli cu nos hendenan cu mester y kier un trabou y 2. aborda dje forma aki tambe e necesidad di trahador cu comercio tambe tin.
