ORANJESTAD – Dialuna atardi durante conferencia di prensa di Gobierno di Aruba, Prome Minister Evelyn Wever-Croes hunto cu señor Edward Tromp, lider sindical di SADA, a anuncia cu e acuerdo riba e tema di indexering 2018 pa 2023 a wordo firma. E firmamento a tuma luga durante un transmision en bibo den presencia di Gobierno di Aruba y lidernan sindical.
Prome Minister a indica cu como bon doño di trabou, Gobierno ta reconoce e esfuersonan grandi cu empleadonan publico ta haci dia den dia afor pa sirbi e comunidad di Aruba. Ta importante pa menciona cu Gobierno di Aruba ta reconoce cu e empleadonan publico, mescos cu comunidad completo, tambe a sufri pa loke ta trata e poder di forsa di compra durante e añanan cu tin tras di lomba, debi na inflacion.
Durante e periodo di Mei 2020 pa December 2022, como muestra di solidaridad, nan a entrega 12.6% di nan salario pa motibo di e pandemia. E añanan anterior, Gobierno no a reconoce e perdida di forsa di compra, p’esey durante e negociacionnan a bin hunto cu sindicatonan pa yega na e suma apropia pa duna como compensacion. Apreciando e esfuerso di cada trahado, Gobierno y representantenan sindical, a yega na un acuerdo den beneficio di empleadonan publico.
Prome Minister a splica cu prome cu por a yega na un acuerdo financiero asina, Gobierno mester a traha na crea espacio financiero pa por cumpli tambe cu e trahadonan, teniendo na cuenta e espacio y normanan financiero. Finalmente, a logra yega na un acuerdo pa loke ta trata indexering di e sueldo di empleadonan publico y “gelijkgestelden”.
E punto di salida tabata e cifra di inflacion di e periodo 2018 te cu 2023, cu ta un total di 6 aña. Conforme cifranan di Departamento di Estadistica, e inflacion riba e promedio anual di e indice di prijs di consumo, tabata pa e temporada aki 16.8%. Mester menciona cu negociacionnan a cuminsa na 2018, 2019, y despues pandemia a bati na porta, pero comienso di e aña aki, Gobierno y lidernan sindical a sinta na mesa pa purba yega na un acuerdo caminda Gobierno ta crea espacio financiero pa por compensa 11.7% di e perdida di forsa di compra den salario di empleadonan publico pa e periodo di 2018-2023.
Prome Minister a indica cu e 11.7% ta bay wordo paga na e siguiente forma:
1) Entrante 1 di Juli 2024 ta aumenta salario di empleadonan publico y “gelijkgestelden” cu 6%.
2) Entrante 1 di Januari 2025 ta aumenta salario di empleadonan publico y “gelijkgestelden” cu 5.7%
3) E primanan lo keda na Awg 6,387 anualmente.
E 11.7% aki ya caba ta inlcui den e presupuesto, y e 6% ta inclui den e voorjaarsnota cu ta e cambio di presupuesto cu ta na caminda pa Parlamento. Tambe tin inclui den e voorjaarsnota Awg 2.8 miyon pa e reparatie toeslag y bijstand pa asina por duna poco bek na e perdida di forsa di compra di esnan mas vulnerabel den comunidad.
“Mi kier gradici nos profesionalnan cu a yuda nos crea e espacio financiero, y tambe durante e negociacionnan. Tambe mi kier gradici señor Orlando Senchi cu ta traha na mi ministerio cu a fungi como un persona interlocutor entre sinidcatonan y Gobierno pa asina facilita e proceso. Un danki tambe na tur empleado publico pa nan sacrificio y dedicacion durante e periodo di espera.
Por ultimo mi ta gradici e sindicatonan, cu despues di negociacionnan intenso, den un tempo cortico y na un manera profesional, a logra yega na un acuerdo cu Gobierno na bienestar di empleadonan publico. Nos lo sigui traha na un forma structural pa atende cu e tema aki, pa futuro gobiernonan por cumpli cada aña cu loke ta indexering, evitando asina añanan di retraso y accionnan di sindicatonan pa loke ta indexering den futuro.
Mi ta felicita tur empleado publico, “gelijkgestelden” y sindicatonan cu e logro aki, y ta gradici un biaha mas e sindicatonan pa tur loke nan ta haci pa hiba Aruba padilanti. Danki na boso, tur empleado publico lo mira un aumento den nan salario pronto,” Prome Minister a expresa.
