ORANJESTAD – Diahuebs mainta 25 di april, Prome Minister Evelyn Wever-Croes a reuni na DOW cu e director y su ekipo di profesional riba diferente tema cu tin pendiente. DOW ta un departamento importante y crucial den desaroyo di pais Aruba den loke ta trata careteranan y planficacion.
Mirando cu e aña aki Gobierno tin mas fondo disponibel pa asfalta por mira tambe cu tin mas proyecto andando. Esaki ta bin cu su retonan, pasobra e capacidad na Aruba en general no ta asina grandi, y tin biaha un proyecto por keda pega, pero awo e retonan ey ta soluciona y ta bay continua cu e trabounan di asfalt rond di Aruba.
Na e momentonan aki e proyecto di reconstruccion di caminda di High Rise Hotel a inicia, y asina otronan lo sigui na e debido tempo. Tin diferente criterio cu ta wordo mira prome cu reparti e trabounan den e districtonan rond di Aruba. Ta mira e necesidad, e careteranan mas frecuenta, esnan cu tin mas tempo wardando y ta mira cuanto cas tin den e vecindario.
Tambe durante e reunion a trata e tema importante di RWZI, no solamente e plantanan na Bubali, sino tambe RWZI Parkietenbos y RWZI Zeewijk. A papia riba e retonan cu tin cu esakinan y e importancia y e urgencia cu tin pa e privatisacion.
E ley ta na Parlamento awor aki y ta spera cu pronto por yega na privatisa e plantanan y asina esakinan lo bay den man di un compania estatal cual ta e compania Utilities. E compania estatal aki si tin e forsa y e capacidad financiero pa haci e inversion necesario pa alivia e situacion actual.
E mandatario a indica cu ya den pasado Gobierno a purba di pone den e presupuesto 16 miyon florin pa inverti den RWZI, pero bou presion di e CAft (College Aruba financieel toezicht), Gobierno mester a kit’e debi na e situacion financiero di pais Aruba. “Pa evita esey ta bay privatisa e planta, y aki cu DOW nos ta haciendo tur preparacion. Aparte di esey tambe a papia di e desaroyo di pais Aruba en general y nos a toca tur e temanan importante y relevante unda DOW mester di sosten di Gobierno pa por cumpli cu nan”, Prome Minister a expresa.
