Durante reunion publico caminda a trata maneho di admision di Minister Glenbert Croes Fraccion di AVP y MAS a cuestiona yen cos y haci como sifuera ta un free for all tin den DIMAS. A pretende cu pueblo no sa unda DIMAS of DPL ta situa, cu pueblo no sa of por haya sa con pa inicia un proceso pa pidi un permiso, cu no tin proceso describi of cu pueblo no lo sa kico tur nan mester entrega na documentacion etc etc. Un hala di ridiculez djis pa crea e scenario di chaos, falta di control y transparencia.
Procesonan den DIMAS
Ta bon pa pueblo realisa cu ta un echo cu procesonan den DIMAS ta describi, proceduranan ta conoci. Esakinan ta ampliamente accesibel via e website di DIMAS. Alabes pa tur proceso tin formularionan standarisa, checklist di kico tur mester entrega, e buki di maneho ta complementa e ley y ta splica tur e diferente permiso,- y rekisitonan (Toelatingshandboek 2023) y e ley ta describi denter di cuanto tempo un cliente mester haya un contesta. Y na e delaster punto aki te ainda tin hopi reto. Te ainda no ta cumpliendo cu clientenan ta haya un contestacion di e termino indica pa ley. Alabes no obstante e echo cu bo por sigui e proceso cu bo peticion ta cana online, ultimamente e mecanismo aki no ta funcionando. Durante di e reunion publico Minister a indica di lo sigui traha duro pa mehora e servicio den tur sentido di palabra y cu e ta bezig cu digitalisacion, automatisacion y modernisacion di e procesonan den DIMAS.
Ta un lastima cu no por atende un asunto asina delicado y di atencion continuo na un manera mas serio y cu e meta pa concentra riba e mehoracion, eficiencia y efectividad di e procesonan y e departamento. Meta principal ta cu clientenan ta keda atendi debidamente y cordial, procesonan ta traha optimal, peticionnan ta keda trata y husga na condicion stipula y leynan existente, cu nos mercado laboral interno ta keda constantemente protehi y ta percura pa nos localnan ta prome yama pa yena vacaturanan cu ta keda crea.
Cifranan di desempleo a baha drasticamentea
Mirando e cifranan di desempleo actualmente na Aruba, nos mester bisa cu esakinan ta subrayando cu e maneho actual ta efectivo y brindando nos localnan tur oportunidad. Cu ainda nos conoce retonan ta un realidad, cu tin cu sigui traha na un miho aansluiting di nos enseñansa na nos mercado laboral ta un echo, pero pa bisa cu nada no ta pasando sigur ta incorecto.
Cifranan di desempleo a baha drasticamente. Si nos ananlisa e cifranan di desempleo nos por mira cu na aña 2021 esaki tabata 8,8%, na 2022: 6,6% y na 2023: 4,3%. E cifranan aki sigur ta papia cla. Un grupo cu mi tabata hopi preocupa pe tabata nos hobennan, pero mi mester bisa cu e cifranan pa loke ta trata e grupo aki tambe ta indica un desaroyo positivo y alentador. Na aña 2020 e porcentahe di desempleo bou di hobennan tabata: 25,9%, na 2021: 19,1%, na 2022: 14,6% y na 2023: 9,9%. Nos no ta unda nos kier ta, pero ta trahando debidamente riba e grupo aki.
Debidamente Ministernan Glenbert Croes y Endy Croes durante tratamento di presupuesto 2024 a indica con ta bay sigui atende cu e retonan pa mehora e aansluiting di enseñansa na e necesidadnan di nos mercado laboral, cu lo brinda nos hobennan un miho perspectiva y alabes stabilisa miho e mecanismo di nos mercado laboral. Minister a informa cu mediante Enseñansa pa Empleo, diferente Jobfair, via comision multidisciplinario, Vierlandenoverleg y Landspakket ta dunando e aspecto aki su debido atencion.
Mi kier finalisa bisando cu enberdad nos tin retonan riba nos mercado laboral. Sigur e necesidad grandi pa trahado cu nos no ta logra yena mediante nos mercado local ta un di nan. Y e alocacion di trahadonan externo conoce su retonan mirando cu e proceso na DIMAS no ta cana lihe suficiente pa por reacciona debidamente riba nan necesidadnan cambiando diariamente. Echo ta si, cu bou di ningun circumstancia por elimina e evaluacion cu ta tuma lugar pa sigura cu no tin un local pa eherce e funcion pa cual un permiso di trabou ta keda pidi. Ta un reto pa crea e balans necesario caminda gobierno ta atende cu proteccion di nos mercado laboral y agilisacion di procesonan na beneficio di desaroyo economico.