Abusado di mucha merece di wordo colga na un palo di luz. Den mi opinion no tin castigo suficiente pa un persona cu ta uza su forsa fisico, posicion di confianza y poder social pa abusa di un criatura indefenso cu ta depende riba proteccion di hende grandi. Un persona maligno asina merece di wordo colga na un pia, boca abou, na jockey, na un palo di luz pa pueblo por mire y expresa nan disgusto. Mas cu claro e metodo aki no ta fit den siglo 21, tampoco no ta aceptabel segun ley di pueblo. Ta hopi obvio si cu e abusado y victima merece un trato husto.
Na juni 2020, parlamento a hisa e castigo pa esnan culpabel di abuso di mucha te cu e maximo posibel den Reino Hulandes, conoci como e Ley di Abuso di Mucha.
Tambe, a traha y ta trahando riba varios proceso pa brinda ayudo na e muchanan cu a bira victima di abuso, pa minimalisa e trauma y optimalisa nan calidad di bida. Ta un hecho cu den hopi caso, esnan cu ta comete e actonan horibel aki, como mucha nan mes tabata victima di abuso. Un opvang multidisiplinario ta importante pa e victima, pero loke ta sumamente importante pa evita cu e trauma cu e victima tin no contribui na un siguiente generacion di abusado. Un abusado condena tambe mester ricibi guia, pa evita cu e lo ripiti e acto hororoso aki.
Pesey, ta bon cu e gobierno actual, bou guia di nos Minister di Husticia y Asuntonan Social, a tuma varios initiativa pa percura pa yuda e victima y pa preveni cu e muchanan bira victima di abuso manera: Sociaal Crisis Plan, Comision Nacional di Abuso di Mucha y Hoben, Codigo di Proteccion, Signs of Safety, Family Justice Center, Mi Mesun Heroe y Plan di Mayor. Mi a invita minister pa bin parlamento y duna un update riba e proyectonan aki. Luna di april ta e luna di conscientisacion nacional contra abuso di mucha, ta bon pa nos reflexiona kico NOS TUR por haci pa proteha esnan mas vulnerabel den nos comunidad.