Den un resolucion adopta April 7, 2011, Asamblea General di Nacionan Uni a designa April 12 como Dia Internacional di Vuelonan Espacial Tripula.
Exploracion espacial ta provee conocimento clave di e historia di nos sistema solar. Sin exploracion espacial lo nos no tin satelite den orbita. Satelite ta asisti nos cu comunicacion global, seguridad y nabegacion aereo, terrestre y maritimo. Sin satelite lo no tawata tin GPS.
Satelite por yuda meteorologo pronostica tempo. Ademas satelite y tecnologia satelital ta hunga un papel crucial den actividadnan di observacion di Tera for di espacio, cual por yuda pa monitor, compronde y adverti nos riba potencial desasternan natural, contaminacion di oceano, factornan cu ta contribui na cambio climatico y salud di oceano y su ecosistemanan, vigila areanan grandi marino proteha, monitorea pesca ilegal y traficacion ilegal di droga, asisti cu investigacion cientifico di biologia marino y na final tambe ta esencial pa agricultura, por ehempel den monitorea awa dushi.
E United Nations Office for Outer Space Affairs (UNOOSA) ta e organo di Nacionan Uni responsabel pa cooperacion internacional den usonan pacifico di espacio ultratrerrestre.
TEMA PA 2024
E tema pa e aña aki ta “Encourage Scientific Curiosity” esta, “Encurasha Curiosidad Cientifico”.
Pasobra espacio, exploracion di espacio, tecnologia espacial y estudio di espacio ta cubri hopi area di cual algun ta aparece regularmente den noticia, manera recientemente e eclipse solar total, ta bon pa fiha kico ciencianan espacial ta cubri promer cu nos papia di encurasha curiosidad cientifico pa esaki.
Ciencianan espacial ta consisti di dos ramo general: astronomia y astronautica, cual ultimo na su turno ta forma parti di ingenieria aeroespacial cual ta cubri tambe tecnologia usa den nos atmosfera (p.e. avion, radar, drone) y tecnologia satelital.
Astronomia ta cubri astrofisica, cosmologia (origen di nos universo), ciencia planetaria, astrochimica, y areanan interdisciplinario manera astrobiologia (biologia no-terrestre), astrobotania y biologia espacial (estudio di efectonan di espacio riba animal y planta).
Di e tecnologianan usa den astronomia nos ta haci mencion especifico di astronomia observacional, manera radio astronomia, astronomia infraroho, astronomia optico, astronomia ultravioleta, astronomia rayo X y rayo gamma y astronomia di onda gravitacional, cual tur ta capta mas di nos atencion ya cu nan ta resalta den noticia regular tocante e James Webb Space Telescope, sondanan pa studia planeta Marte, luna, asteroide y cometa y tipo di planeta cu ta orbita otro sistemanan estelar (exoplaneta), entre otro den e buskeda pa exoplaneta cu por tin bida.
Astronautica, cu ta un parti di ingenieria aeroespacial ta inclui tecnologia espacial pa vuelonan espacial, arquitectura espacial entre otro pa diseño di modulo pa habitacion espacial y estacion espacial y estudio di bida den espacio di cual ta resalta bioastronautica, estudio di efectonan di espacio riba curpa humano, produccion di alimento y productonan farmaceutico den espacio (farmacia espacial).
Pues tin hopi area y tema den cual nos por encurasha curiosidad cientifico.
Nacionan Uni a crea mediante varios di su organonan programa, proyecto y iniciativa cientifico enfocando riba ciencia y of tecnologia espacial y en particular nan aplicacion practico den areanan concreto.
E edicion No. 6, 2020 di ITUNews Magazine di International Telecommunication Union ta dedica na e tema “Space Science for Achieving the Sustainable Development Goals” y ta enfoca ariba e importancia di observacion di tera for di espacio, monitoreo di atmosfera, oceano y clima.
Pero e importancia di tecnologia espacial ta hopi mas amplio y pesey den e Resolucion A/76/L3 adopta pa Asamblea General di Nacionan Uni, 25 oktober 2021 a crea e Space2030 agenda como instrumento di impulso pa logra e Obhetivonan di Desaroyo Sostenibel (SDGs).
Den e rapport di UNCTAD titula Exploring Space Technologies for Sustainable Development di 2021 ta destaca seis area principal (1) alimento y agricultura, (2) aplicacion den cuido medico y salud, (3) acceso na telecomunicacion y internet, (4) reduccion di riesgo di desaster y asistencia humanitario, (5) maneho di recurso natural y medio ambiente y (6) reduccion di pobresa.
Den e capitulo dedica na avanzenan tecnologico recien ta identifica (1) intelligencia artificial y cloud computing, (2) plataformanan emergente di tecnologia satelital y aereo y (3) crowdsourcing.
Tambe ta señala e falta di conocimento di e beneficionan di tecnologia espacial y scarsedad di recurso humano y financiero pa utiliza esakinan.
Den un presentacion di Danielle Wood di MIT Media Lab y directora di e Space Enabled Research Group di MIT ta identifca seis tecnologia espacial cu actualmente ta sostene e SDGs: (1) satelllite earth observation, (2) satellite positioning and navigation, (3) human space flight and micro-gravity research, (4) satellite communication, (5) space technology transfer y (6) inspiration from research and education.
E SDG cu mas ta beneficia di tecnologia espacial ta SDG 9, Industria, Innovacion y Infrastructura.
Den e publicacion di UNOOSA y e European Global Navigation Satellite System and Copernicus, Supporting the Sustainable Development Goals: Building Blocks towards the 2030 Agenda ta duna un resumen detaya pa cada un di e 17 SDGs con por aplica tecnologia espacial.
UNOOSA pa facilita acceso na tecnologia espacial pa tur pais por utilisa esaki den logra e SDGs a crea e programa Space4SDGs.
Pa loke ta astronautica cu ta toca e area di vuelonan espacial tripula tin hopi actor den sector publico y sector priva activo. Di companianan den ingenieria aeroespacial, agencianan espacial, di cual NASA y ESA ta esnan mas conoci, pero ultimamente nos ta wak paisnan manera Japon, Sur Korea, Emiratonan Uni Arabe, India, China y Rusia activo tambe den manda sonda pa investiga Marte, luna, asteroide y nos sistema solar.
Exploracion espacial comercial di SpaceX, Blue Origin, Virgin Space y hopi mas ta creando un panorama nobo completo di industria liga na astronomia y astronautica.
Esakinan lo requiri personal cualifica y tecnico den ramo nobo y existente, pa cual lo bay tin mester di un generacion nobo di ingeniero, cientifico y tecnico pa cumpli cu e demanda di personal specializa.
Pesey e tema pa e aña 2024 ta “Encurasha Curiosidad Cientifico”
Na Aruba y den exterior tin hopi Arubiano activo den e ramo di astronomia y astronautica y varios trahando tanto na NASA na Merca como ESA na Europa y nos por conta cu un cantidad di studiante Arubiano gradua den ciencianan espacial.
Aruba como pais cu un grado halto di digitalisacion, utilisacion di Internet, servicio online y un infrastructura di telecomunicacion avanza por beneficia di utilisacion di ciencia y tecnologia espacial pa desaroya y amplia su base economico.
Telecomunicacion avanza y infrastructura digital por contribui na crea sector industrial high tech nobo na Aruba, particularmente entre otro mediante e programa Space2030 y Space4SDGs.