ORANJESTAD – Cada aña ta tuma lugar un “Verdragenoverleg” Conferencia Anual di Tratado den reino Hulandes. E aña aki e conferencia anual ta tumando lugar pa di 35 aña y pa DBB Aruba ta un honor di por ta anfitrion di e conferenciaaki. E delegacion ta consisti di Funcionarionan cu ta traha den e Departamento di Tratado di Ministerio di Relacionnan Exterior di Reino Hulandes y Directie Buitenlandse Betrekkingen (DBB) di Aruba, Corsow y Sint Maarten.
Tur 4 pais den reino Hulandes ta comprometi pa traha hunto y pa coopera estrechamente pa logra (establece), implementa (aproba) y ratifica tratadonan. Durante di e consultanan anual e delegacionnan ta comparti conocemento entre e paisnan y ta nota cu e lista di tratadonan ta crece continuamente. Esaki ta keda demostra tambe den e agenda amplio cu ta wordo trata e aña aki den e Conferencia Anual di Tratadonan. Pa e motibo aki e proyecto “Medegelding pa Aruba, Corsow y Sint Maarten ta importante tanto pa gobierno y comunidad di Aruba.” Den e “proyecto di Medegelding” ta evalua e forma di intensifica e cooperacion y ta traha un strategia especifico pa cada tratado. En general ta enfoka riba dos area clave pa trata e tratadonan selecta: di un banda comparti conocemento y experticio y di otro banda duna y ricibi sosten.
Aruba, hunto cu e otro paisnan den Reino, por identifica cua tratadonan tin prioridad pa medio di e “proyecto di Medegelding”, y lo traha cu prioridad riba e tratadonan aki pasobra nan tin gran importancia pa Aruba y otro paisnan den Reino Hulandes. E tratadonan concerni tin como meta pa proteha bida y bienestar di tur ciudadano. Sea cu e ta pa combati corrupcion, proteha medionan marino of preveni y bataya violencia contra hende muhe. Tratadonan ta di suma importancia pa nos comunidad.
Na inicio di e Conferencia Anual di Tratadonan den Reino tumando lugar dia 9 y 10 di april, Prome Minister a anuncia cu pa Aruba e procedura ta asina avansa cu tur rekisito ta cla pa Aruba por ratifica e tratado di Cybercrime di Raad van Europa. Mas informacion di e tratado lo wordo comunica na su debido tempo.