Apreciabel señor Paskel,
Banda di 24ora y Enfoke, Edmond Croes ta keda chikito ora ta trata di bin cu storia sensacional, e scandalonan di mas grandi, crimennan impactante, redo y otro temanan cu ta mishi cu emocion. Abo cu Speed ta provocativo, pret, humoristico y ta papia “caya”. Pero, a pesar di boso pretencion di ta trece informacion veridico y imparcial, boso ta hopi leu ainda di periodismo di calidad y ainda mas leu di e principionan di e “Global Charter of Ethics for Journalists”.
Boso reportahenan troci ta causando cu awe hopi hende no sa cu Paul Croes ta cera pa motibo di corupcion y en particular soborno. Pa motibo di boso desinformacion hopi hende no sa cu Benny Sevinger su sentencia di dia 14 di april 2023 tambe ta encera corupcion den forma di soborno. Bo no por comete soborno si no tin un funcion envolvi. Pero danki na boso campaña di engaño awe hende cu ta supose di sa miho, manera Duke Croes, ta kere cu e sentencianan di Paul y Benny solamente tin di haber cu algo chikito den cuadro di e fundacionnan pa nan campaña. Hopi hende ni sikiera sa cu ta trata di malversacion.
Caramba Patrick, bo ta supose di sa cu periodismo sensacionalista partidario ta un peliger pa nos democracia y nos estado di derecho. Nos leynan y sistema hudicial ta esencial pa un sociedad stabil. Sin embargo, abo y Speed ta uza boso plataforma pa erosiona e confianza di pueblo den nos institucionnan hudicial.
Pa colmo Patrick, bo ta gaña pueblo cu loke bo ta bisa, bo ta bisa cu prueba. Haci loke bo ta bisa y no manera bo a bin ta haci durante Enfoke. Un ehempel ta e programa di dia 4 di april 2024 ora bo persona a declara cu e condenanan di Paul y Benny solamente tin di haber cu nan fundacionnan di campaña. Esey ta un mentira y bo sa. Djis lesa nan sentencia bek pa bo comproba cu ta trata di corupcion y soborno (ECLI:NL:HR:2023:167 y ECLI:NL:OGEAA:2023:7).
Loke ta mas condenabel ta cu di e forma aki abo hunto cu Speed a bira boca y microfon pa Mike Eman cu ta encabesando un campaña di mentira. Boso a bira complice di e indiferencia total di AVP pa cu e bienestar di un pueblo cu tin mester di leynan y un sistema hudicial pa tin futuro.
E no ta duna boso berguensa cu boso ta bezig cu periodismo iresponsabel cu ta buscando voto pa AVP, manipulando informacion pa logra control psicologico di pueblo? Pa colmo boso ta trigger emocion pa hende no activa nan mesun pensamento critico. Periodismo responsabel ta rekeri verificacion di informacion, specialmente encuanto temanan delicado. Ofrece un variedad di perspectiva tambe ta crucial. Boso gran audiencia ta confia cu boso informacion ta por lo menos un tiki fiel y berdadero, pa asina nan por tuma nan decisionnan informa. Pakico mi mester recorda boso cu algun siman pasa caba boso tabata pushando Gerlien Croes, dunando splicacion eroneo encuanto nos Codigo di Procedimento Penal Nobo? Si boso a prepara boso programa na drechi, boso por a haci pregunta serio na Gerlien, en bes di haci e blunder di dun’e plataforma comosifuera cu e ta un gran experto den ley y derecho humano.
Boso por miho. Boso por eleva e nivel di periodismo si di buena fe boso cuminsa duna prioridad na e verificacion di informacion, prome cu boso ta bisa of publica algo. Esey ta encera cuestiona Mike Eman of cualkier otro politico cu preguntanan skerpi, pa asina pone e berdad riba un pedestal. Periodismo di calidad tambe ta encera presenta un gama mas amplio di perspectivanan riba temanan manera esun di e sistema hudicial di Aruba. Asina e ciudadano mes por tuma su conclusion.
Periodismo di calidad no por ta complice di un campana politico cu di mala fe kier debilita nos Ministerio Publico y cu ta obstaculisa cu politiconan ta duna cuenta na husticia. Prensa, incluyendo 24ora, tin un responsabilidad grandi pa fortalece nos democracia. Ley ta un expresion di e bos di pueblo. Tur politico mester respet’e. Ministerio Publico mester investiga su cumplimento y hues mester castiga esun cu ta viol’e.
Atentamente,
Ryçond do Nascimento.