ORANJESTAD: Recientemente, Minister di Enseñansa y Deporte Endy Croes a reuni cu e diferente stakeholder pa dialoga tocante e desaroyonan di e proyecto di construccion di Juliana School. Manera ta conoci, final di aña pasa a aproba 6.7 miyon florin pa e proyecto aki, ora cu Aruba tabatin un restante (overschot) den su financia y surplus cumpliendo cu e 1 porciento di e 70 miyon cu Hulanda. E proyecto tabata prepara caba, pero no tabatin fondo. Pues, aki ta unda a logra aloca fondo pa construi un edificio completamente nobo pa Juliana School. Manera nos sa, desde aña 2014, gobierno bou di maneho di AVP a cera Juliana school y a manda e team na otro localidad cu no ta adecua pa duna y/of haya les. Pa e motibo aki, a opta pa construi un edificio nobo pa Juliana School. Den cuadro di esaki, tanto DOW, DIP, team di arkitecto y Ministerio di Enseñansa ta trahando duro pa logra pone e prome piedra e aña aki y asina inicia oficialmente cu e construccion di un scol ultramoderno na Paradera. En bista di esaki, cada dos (2) siman ta reuni cu ful e team pa evalua e desaroyonan cu tin. Minister Endy Croes a indica cu tur cos ta canando bon y ta trahando duro pa pronto por anuncia un “groundbreaking” di esaki.