“Pa Gobierno ningun tipo di abuso ta aceptabel, pero ta importante pa por conta cu e pueblo di Aruba pa yuda den e lucha aki”
ORANJESTAD – Na final di e conferencia di prensa di Gobierno di Aruba riba e tema di Luna Nacional di Conscientisacion Contra Abuso di Mucha, Prome Minister Evelyn Wever-Croes a gradici tur e profesionalnan cu tabata presente pa duna nan parti, den comparti informacionnan valioso cu e comunidad. Tambe, el a gradici tur e profesionalnan cu no tabata presente pero cu tambe ta traha duro den e lucha pa combati abuso/abuso sexual di menor. Esaki ta un tema cu ta yega hopi serca di Prome Minister su curason, y pesey, como mandatario di pais Aruba, e ta comprometi pa sigui traha na bienestar di nos muchanan.
Tambe, Prome Minister a haci un yamada na comunidad en general pa duna di nan parti den yuda Gobierno y instancianan concerni pa bringa efectivamente tur tipo di abuso di mucha. Pa Gobierno ningun tipo di abuso ta aceptabel, pero ta importante pa por conta cu e pueblo di Aruba pa yuda den e lucha aki. Como ciudadanonan orguyoso di pais Aruba, ta importante pa cada un compromete nan mes den proteha nos muchanan, percurando asina pa nada malo pasa nan, y ofrecenan tur clase di amor y cariño, pa asina nan por crece y bira adultonan cu por carga e pais aki.
En conexion cu Luna Nacional di Conscientisacion Contra Abuso di Mucha, lo tin varios actividad den luna di April. Si tin cualkier persona interesa den organisa un actividad relaciona cu e tema aki, por contact e instancianan concerni, of Gobierno pa cualkier asistencia. Importante ta pa e mensahe ta uno cla y cu e por yega na cada ciudadano, conscientisando asina e comunidad en general. E tema aki no ta uno facil, y pa esnan cu a pasa aden, e ta un dolor grandi, y pa cu esaki Gobierno ta compromete su mes pa yuda den percura cu niun mucha mas ta bira victima di abuso. Aruba ta conta cu sosten di henter comunidad den e lucha contra abuso di menor.