ORANJESTAD: Recientemente, Minister Endy Croes a ricibi bishita oficial di dr. Midge Simmons, kende ta “Assistant of the Dean” di Wayne State College di Nebraska, docente di IPA Sra. Roke Hoen y Sra. Darrelyn Maduro, kende ta coordinado y facilitado di e Master of Science in Education (MSE). E “Curriculum & Instruction – Instructional Leadership” na Aruba a ser ehecuta cu sosten di Minister di Enseñansa Endy Croes y Wayne State College den colaboracion cu Instituto Pedagogico Arubano (IPA). Desde juni di aña 2023, dr. Midge Simmons, ta eherce e funcion nobo di coordinado di e “Master of Science in Education Program”. Durante e encuentro, dr. Simmons a informa mandatario di Enseñansa di e desaroyonan positivo di e di dos grupo cu ta siguiendo e “Master Program” na Aruba. Nan ta grupo “Aruba 02 Community” cu ta conta cu participacion di 13 maestro y/of docente di scol preparatorio, scol basico, scol basico special y scol secundario di havo/vwo 4. E gruponan di MSc in “Education Aruba” 01 y 02 a siña hopi teoria, metodologia y practica innovativo cu nan ta aplica y asina hunto construi conocemento nobo cu ta pas bon den e contexto y cultura di Aruba y ta aporta na Minister Endy Croes su vision di Plan Educacion Nacional (PEN) 2030. Ademas di esaki, Sra. Hoen a informa Minister Endy Croes di nan deseo pa haya e oportunidad pa guia un grupo di e graduadonan di Aruba 01 y futuro graduadonan di Aruba 02 hunto den un scol cu un concepto nobo, den cual nan por desaroya un ambiente di siñamento“ cu enfoke riba inclusion, igualdad y desaroyo di bienestar social emocional y mental. Un caminda unda cada mucha ta ricibi e posibilidad pa desaroya su mes optimalmente pa ta exitoso. Den e sistema di enseñansa tradicional ainda tin e ideologia di “one size fits all”. Ta manera nos ta puntra un pisca, un olifante, un lagadishi of un trupial pa nan bula halto y canta bunita pa nan por gradua, mientras cu nan tur ta diferente y tin habilidad- y talentonan diferente cu ta importante, pero no ta haya e oportunidad di demostra esakinan. Asina tambe cada mucha ta diferente, ta desaroya diferente y tin su talento- y necesidadnan specifico cu merece atencion. Den cuadro di esaki, Minister Endy Croes a elabora riba e exito di Educampus cu tin un otro manera di traha. Tambe, e mandatario di Enseñansa a indica cu ta dificil pa financia un scol nobo, pero nan por presenta un plan y e ta dispuesto pa wak esaki y sondea e posibilidadnan.
Ademas di esaki, Sra. Hoen a informa Minister Endy Croes di e programa Stima mi, Guia mi cu ta un iniciativa di Kiwanis Club of Palm Beach y ta un curiculo innovativo p’e mayornan y nan yiu di 0 pa 4 aña. Sra. Hoen a desaroya y ehecuta e proyecto aki hunto cu Fundacion pa nos Muchanan, Tienda di Educacion, Respeta Mi, Wit Gele Kruis y Centro pa Hoben y Famia. Desde aña 2021, nan ta ofrece e programa aki gratis na mayornan pa nan por sostene e desaroyo di e celebro di nan yiu na un manera optimal, stimula desaroyo positivo y bienestar social-emocional, mental, cognitivo y fisico di nan yiu pa medio di ta un mayor sensitivo responsivo. E programa aki ta basa ariba “Evidence-based best practices” di “Parenting” pa pone e fundeshi pa un desaroyo sano, positivo y un carera escolar y futuro exitoso p’e muchanan. Por ultimo, a invita e mandatario di Enseñansa pa asisti e graduacion di e grupo 2 di WSC otro aña.