ORANJESTAD – Diahuebs anochi 27 di maart Prome Minister Evelyn Wever-Croes a wordo invita pa e inauguracion di e Conferencia Musico a Musico 2024. Esaki a wordo organisa pa Good Samaritan Christian Center (GSCC).
Prome Minister a habri su discurso gradiciendo pa e oportunidad y a expresa cu ta un honor di por hiba palabra. Prome Minister a sigui bisa cu ta masha bunita pa wak con a traves di musica y arte por alaba Señor. Tambe, durante e discurso el a mustra e importancia di Dios den bida di nos tur. Ta berdad cu constitucionalmente tin cu separa religion y gobernacion, pero den e ser humano mester di Dios y den un gobernante semper lo bo kier Dios.
Tambe Prome Minister a purba inspira e hobennan splicando con importante ta ora por ehempel bo ta canta den bo iglesia, y a expresa cu e mes ta miembro di un coro cu ta un manera pa e como persona por alaba Señor.
“Mi a priminti mi mes cu mi lo tene e discurso cortico y pesey ya cerando mi kier gradici boso tur pa e trabou cu boso ta haci. Tambe pa ta un inspiracion pa hopi hende, y sigur pa mi tambe. Mi ta spera cu e seminarionan lo ta hopi exitoso, y di por ta un inspiracion pa nos hobennan ta mas envolvi den actividadnan asina”, Prome Minister a expresa.