ORANJESTAD – Riba dia Mundial di Trahado Social, Prome Minister Evelyn Wever-Croes a atende un evento organisa pa Minister di Asuntonan Social como gradicimento pa e trabou cu nan ta bin ta eherciendo y pa celebra e dia special aki cu nan. Riba e mainta aki, Prome Minister tabata tin e oportunidad di duna un discurso, na unda el a indica cu e dia aki ta un dia pa para keto y celebra, pero tambe pa reflexiona riba e contenido di trabou social cu nos mester pa wordo ehecuta aki na Aruba y henter mundo.
Tambe, prome cu finalisa su discurso, Prome Minister a comparti su preocupacion pa cu tema di abuso sexual di mucha na Aruba. El a splica cu desde inicio di gobernacion di Gabinete Wever-Croes, Gobierno a haci tur loke tabata na nan alcanse pa purba yuda na preveni e abuso contra nos muchanan. Gobierno a traha leynan y proceduranan pa percura pa haci e castigo pa cu e acto aki mas severo. A purba traha riba prevencion y educacion cu ta hopi importante pa yuda preveni y a pone mas atencion na e veld social biniendo cu e Codigo di Proteccion, “Signs of Safety. Tambe a firma MOU’s pa cuido di victima. A construi e Family Justice Center y mucho mas.
Prome Minister a indica cu apesar di tur loke cu Gobierno a haci pa purba na preveni abuso contra nos muchanan, na momento cu a haya resultado di e estudio haci, a yega na e conclusion cu 99% di e casonan di abuso sexual di mucha ta wordo cometi pa un persona hopi cerca di mayornan of famia di e mucha. E resultado aki sigur ta trece cu ne hopi duda y ta pone nos cuestiona, kico por wordo haci den e caso aki. Pa cu esaki, Prome Minister a pidi e trahadonan social pa yud’e bin cu ideanan y opcionnan pa con por sigui conscientisa e comunidad lo mas posibel riba e tema aki, pa asina preveni cu e casonan aki ta sigui pasa den futuro.
“Esaki ta un dolor grandi cu mi ta carga den mi curason y mi kier a comparti’e cu cada un di boso, pidiendo boso como experto yudansa den proteha nos criaturanan indefenso, cu ta conta riba nos pa proteccion. Mi ta gradici boso di curason pa tur boso esfuerso y dedicacion den e veld social, y mi ta spera cu boso sa cu como Prome Minister di pais Aruba, mi tin un respet inmenso pa boso trabou”, Prome Minister a expresa.