Savaneta – Dialuna marduga rond di 4:40 a.m polis ta wordo informa di un accidente serio ariba e caminda di Savaneta, altura unda antes tawata Domino’s Pizza.
Prome informe tawata cu un Nissan March a dal contra un truck di Eco Truck.
Pero den algun seconde nan a mira en realidad kiko a sosode, y cu tin un brommer envolvi.
Na e sitio nos a compronde cu e Nissan March a bay pa pasa e truck di Eco Tec cu tawata bayendo pariba.
Pero mirando cu e auto ta right hand drive bo no tin e bista completo pabo bay pasa un auto grandi sin tin peliger.
Aki e brommer net tawata biniendo y ta dal frontal cu velocidad halto, y ta kibra na pida pida.
E tanki di e brommer a kita y a pega candela, e tanki aki tambe a bay dal un meter di awa kibra, unda cu polis mester a notifica WEB.
Brandweer a wordo pidi na e sitio tambe pa e tanki cu tawata na candela.
Durante di e impacto e March a bay dal parcialmente contra e truck di Eco Tec. Chauffeur di e truck a sinti algo dal y despues di un rato a mira e tanki na candela pasa bay. Ya e momento ey tur e desaster a pasa patras. Chauffeur di e Nissan March a wordo deteni, door cu e la nenga di coopera cu polis pa supla, esta alcohol test.
Autoridad ta papia di un accidente cruel, unda cu e hoben(20) a fayece al instante debi na e multiple trauma ricibi.
Tur departamento concerni a wordo avisa y a presenta.
Famia di e victima tambe a yega y tawata un momento duro.
Slachtofferhulp a sa di trata cu nan.
Esaki ta bira e di 2 morto den trafico aki na Aruba.
