Honorable Miembronan di Corte Superior,
Relaciona cu e decision di Corte di Apelacion pa Aruba, Curaçao , St. Martin y pa Bonaire, St. Estatius y Saba (Corte) pa legalisa matrimonio homosexual na Curaçao y Aruba e organisacionnan di iglesianan y pastornan di e respectivo paisnan aki kier a trece lo siguiente na atencion di Corte.
Den su consideracion di dia 6 di december 2022 si por papia di discriminacion Corte ta bisa cu matrimonio homosexual ta comparabel cu matrimonio heterosexual y pesey e ta igual cu matrimonio homosexual. E conclusion aki ta bay contra:
- Articulo 12 di Tratado Europeo pa Derecho Human (TEDH) consecuentemente no por papia di discriminacion;
- E veredicto di Corte Europeo pa Derecho Humano (CEDH) di 24 di juni 2010 cu ta bisa cu CEDH no por impone matrimonio homosexual riba paisnan miembro;
- Codigonan Civil di Curaçao, Aruba y St. Martin cu ta declara cu ‘matrimonio por existi solamente entre un homber y un muhe.’
Corte ta bisa cu Constitucion ta condena nos Codigo Civil riba ‘discriminacion.’ E conclusion aki ta incorecto. Corte mester a evalua nos Codigo Civil a base di TEDH y yega na e conclusion cu no por interpreta nos Codigo Civil contrario na TEDH.
Tanto Corte como Abogado General di Corte Superior ta cita cu tin un grado halto di aceptacion di homosexualidad den e paisnan concerni di reino. Aceptacion no ta un argumento solido si tene cuenta:
- Cu aumento di aceptacion na Europa no tabata motibo pa CEDH legalisa matrimonio homosexual.
- E gobiernonan concerni a bay den apeleacion dos biaha contra e veredicto;
- E proposicion di ley matrimonio homosexual cu a entrega na 2019 na Parlamento di Curaçao no a sigui cana;
- Cu na Aruba un accion di firma espontaneo contra homosexual na 2023 a produci mas cu 16.000 firma cu ta ekivalente na 5 asiento;
- Cu apesar cu na Hulanda supuestamente tin aceptacion grandi, nan ta uza ley penal na un forma represivo contra esnan cu no ta di acuerdo cu e ideologia di genero.
- Cu despues di dos decada solamente 35 di e 193 pais afilia Nacionnan Uni a legalisa matrimonio homosexual y ta solamente 3 pais a haci esaki pa medio di un referendum;
- Cu 82% di e paisnan di afilia na Nacionnan Uni ta rechasa matrimonio homosexual;
- Cu e expectativa cu Curaçao y Aruba ta dispuesto di apela un eventual decision negativo na un Corte mas halto.
CEDH den varios sentencia a confirma cu no ta existi derecho riba matrimonio homosexual. Asina mes CEDH ta exigi di e paisnan miembro cu nan ta ofrece un alternativo riba matrimonio homosexual. E unico diferencia entre matrimonio civil y union civil ta e cantidad di derecho cu ta duna cada uno. Ya cu union civil ta encera e relacion intimo tambe paisnan miembro ta wordo forsa pa reconoce e relacion homosexual y pa duna derecho na esaki. CEDH ta admiti tambe cu e obligacion aki ta basa solamente y unicamente riba e argumento subhetivo di aceptacion bou di e pueblo Europeo y no riba derecho humano. Aki ta trata di fabor na parehanan homo y no derecho humano. Cu otro palabra ta duna derecho cu no ta basa riba ningun derecho. Esaki ta causa contradiccionnan serio. Den area di Caribe absolutamente no por papia di “a rapid evolution of social attitudes towards same-sex couples.” Den varios estado di Caribe hasta tin ley contra sodomia. Anto e teritorionan cu ya a introuci matrimonio homosexual, menera islanan BES y Departamentonan Frances, ta teritorionan di ex colonisadonan cu tabatin poco libertad den esaki. Nan no a consulta cu e pueblonan di Puerto Rico y US Virgin Islands den e asunto aki
Nos ta tuma e libertad di cita un texto di Bijbel.
Pasobra ora e paganonan (no Hudiunan), kendenan no tin Lei, di naturalesa ta hasi e kosnan di Lei, esakinan, ounke nan no tin Lei, ta un lei pa nan mes, dor ku nan ta mustra e obra di Lei ku ta skirbí den nan kurason…..Romanonan 2:14-15 (Beibel Santu).
Un di e motibonan pakico problemanan mental ta hopi halto bou di homosexualnan por wordo haya den e realidad cu hende tin un consenshi duna door di Dios pa cual consciencia di bon y malo ta registra den e alma. Homosexualidad ta un violacion di e ley di interno di Dios pesey esun envolvi den esaki ta experiencia trastorno mental continuo. E realidad ta cu no ta e atraccion ta locual ta causa trastorno mental sino hustamente entrega na deseonan homosexual. Si uza e curpa na un manera cu no ta cuadra cu su diseño y funcion esaki ta conduci na problemanan mental y fisico.
Hof a bisa cu adopcion no ta relevante den e caso aki, pero hues mester por premira cu unabes matrimonio homosexual ta reconoci pa ley esaki lo afecta derecho y libertadnan di otro personanan. Nos ta menciona como ehempel:
- E derecho di mucha pa lanta cu un figura di tata y mama.
- E libertad di duna asistencia na un persona cu no ta desea di entrega na su deseonan sexual pa personanan di mesun sexo.
- E derecho di mayornan pa mantene e libertad pa nan yiunan no wordo siña cu comportacion homosexual ta natural.
Pa e motibonan ariba menciona suscritonan, den nomber di e mayoria di e respectivo pueblonan, ta haci un apelacion riba e honorable cabayeronan y damanan di Corte Superior pa anula e veredicto di Corte di 6 di december 2022 tocante matrimonio homosexual y laga e decision den man di e Parlamentonan di Curaçao y Aruba.
Atentamente,
Said Flores, Presidente Asosashon Pastornan di Korsou (APK).
Gilberto Martes, Presidente Iglesianan Cristian di Aruba (ICA).
Orlando Wilson, Presidente Sint Martin United Ministerial Foundation.