” Nan tawata tin mester di algo”
Tanki Leendert / Shaba – Diahuebs marduga polisnan na warda di Shaba a bay den alerta, momento cu a nota presencia di un of mas hende den e tereno di e warda.
Mesora agentenan a reacciona pero e persona/nan a logra huy, pa un momento.
Mientrastanto, varios unidad di otro districtonan a cuminsa bay Shaba pa yuda.
Despues di algun minuut, a logra spot e vehiculo cu lo tawata envolvi, tawata trata di un Kia Picanto color geel. Esaki a wordo gespot bayendo direccion rotondo Tanki Leendert.
Altura di Citgo Tanki Leendert e la wordo intercepta y blokia door di varios patruya memey di caminda. Den e auto tres persona, dos hende homber y un muhe.
Polisnan a bay over na detene tur tres, un a wordo transporta separa, mientras e dama y mucha homber bastante hoben a bay den transportwagen. Tur a bay warda di Shaba.
Kiko exactamente tawata pasando den cabes di e trio aki no ta conoci. Hypothesis, nan por a drenta pa horta piesa di auto/scooter mirando cu polisnan a haya tool den e auto. E otro hypothesis ta, benta algo pa un persona cu nan lo conoce cu ta cera na Shaba.
Investigacion lo mester determina pakiko e hendenan aki, den ora di marduga a dicidi di subi tereno di un warda di polis unda cu nan no mag di ta.
Esaki ta un di e multiple biahanan cu desconocido/nan ta drenta tereno di wardanan di polis, den transcurso di aña nan.
