Eagle History Tour: Un recorido den tempo cu ta honra e historia di e refineria di Eagle, e rol di Aruba den Segunda Guerra Mundial y nos herencia cultural.

Dia 16 di februari Stichting Monumentenfonds Aruba den presencia di mandatarionan, partnersnan di e proyecto y invitadonan a lansa e proyecto di Eagle History Tour. Minister di Cultura, Xiomara Maduro, a duna inicio na e proyecto, cu e meta pa conscientisa tocante e historia di e refineria di Eagle y su rol durante Segunda Guerra Mundial, rib’e fecha cu exactamente 82 aña pasa Aruba a keda envolvi den guerra.

E iniciativa aki, cu a  conta cu e apoyo di Vfonds na Hulanda, tin como meta pa atrae residente y bishitantenan y asina promove un conocimiento mas profundo di Aruba su historia y herencia.

E proyecto tin varios meta:

Conmemora: Honra e victimanan, incluyendo 4 marinier, cu a perde nan bida durante e desmantelacion di e torpedo na Eagle Beach.

Educacion: Informa e comunidad local y bishitantenan tocante e historia di Eagle Beach y Aruba su rol crucial durante e Segunda Guerra Mundial.

Conscientisacion cultural: Enfatisa e importancia di e refineria di Eagle den e historia di Aruba y crea consientisacion pa medio di obhetonan di arte, programanan educativo y participacion comunitario.

E historia di industria di petrolio na Aruba a inicia na 1924 ora cu Lago Oil & Transport Co. Ltd a establece na Sint Nicolaas Baai y na 1927 Arend Petroleum Maatschappij N.V. a habri su refineria na e parti west di e isla. Esaki a comberti Aruba den un di e productornan di petroleo refina mas grandi di mundo den corto tempo.

Durante e Segunda Guerra Mundial, Aruba a bira un blanco pa atekenan Aleman. Esaki a hiba na eventonan tragico caminda bidanan a bay perdi durante un atake na e refineria di Eagle.

E proyecto ta inclui varios sub proyecto manera programanan educativo, un audio tour titula: ‘Eagle History Audio Tour’ y obhetonan di arte di luz crea pa Studio Goddijn cu lo conta e historia di e refineria. E iniciativanan aki no lo pone enfasis solamente riba e sitionan historico de e area pero tambe enfoca riba e importancia di preserva esakinan pa e comunidad di Aruba.


Stichting Monumentenfonds Aruba ta gradici un y tur cu a forma parti di e proyecto aki. Y ta invita e comunidad pa participa den e biahe aki door di tempo y siña mas di e historia di e refineria di Eagle.

Pa final di maart e recorido lo ta completo cu tur e borchinan di informacion pero for di awor ya por sigui e recorido di audio via di www.izi.travel y bishita e obheto di arte di luz na edificio di DRH na L.G. Smith Boulevard 172 caminda cu originalmente tabata e oficina principal di e refineria di Eagle.
Akinan lo por admira obhetonan traha di tuberianan di refineria recicla y cuta conta e storia di e refineria y recorda e trabounan cu tabata eherce for di e punto aki cu tabata maneha e refineria di Eagle.

Cu enfoke riba preservacion, educacion y identidad cultural, e tour historico di Eagle ta contribui na preserva e historia di Aruba pa e futuro generacionnan.

Pa mas informacion: www.monumentenfondsaruba.com @monumentsfundaruba Fb: Stichiting Monumentenfonds Aruba