E parlamentario Lopez Tromp, a haya gana di acusa Minister Glenbert Croes di a duna un criminal permiso. Un mentira flagrante, un wega politico baho cu e unico meta di purba gana voto y simpatia riba lomba di e mandatario cu hustamente ta trahando duro y corecto riba e.o. integracion.
Pregunta 1. Relaciona cu otorgamento di permiso
E prome pregunta di Parlamentario Lopez-Tromp, ta cuestiona si Minister Croes a otorga un permiso cu no ta segun conseho di DIMAS, mirando cu Minister Croes tabata sa cu e persona en cuestion lo a comete un crimen contra su mesun departamento.
Contesta: Riba e pregunta aki, Minister Croes a contesta Parlamentario Lopez-Tromp, indicando cu e persona en cuestion tabata tin 5 permiso di trabou y 2 di estadia bou di personalia falso, y tur 7 permiso a wordo otorga door di DIMAS. E temporada cu e permisonan aki a wordo otorga, Minister Croes no tabata ni sikiera e minister encarga cu e cartera di integracion, pero ta asumi cu DIMAS a encamina e proceso normal di verificacion.
Minister Croes a sigui splica cu e di 8 permiso a wordo nenga pendiente di un investigacion na Censo, mirando cu e persona aki a declara voluntariamente, di tin un identidad falso desde cu e tabata menor di edad. Na November 2022, e persona aki a cuminsa un caso na corte pa pidi medida temporal y esaki ta momento cu Minister Croes a haya conocimento di e caso aki.
Pa loke ta trata permiso number 9, Minister Croes a indica cu despues di a tuma conseho di AVI-commissie, cu a basa nan conseho riba e veredicto di hues di dia 8 di Februari 2023 (Lar. nr. AUA202204192), a otorga dicho permiso. Tambe Minister Croes a splica cu DIMAS a manda conseho pa su persona den e caso aki. Y e conseho di DIMAS tabata pa revoca e permisonan anterior(1-7), cu DIMAS mes a otorga como departamento y pa warda e resultado di diferente investigacionnan prome cu otorga permiso 9 y 10. DIMAS no a conseha pa no otorga ningun permiso. Peticion pa cu revocacion di permisonan anterior ta den evaluacion, y pa loke ta permiso 9 y 10 lo keda pendiente pa veredicto den e caso aki pa tuma un decision final.
Pregunta 2. Relaciona cu Minister Croes su presencia den Parlamento pa un reunion publico realciona cu e topico di Directeur di DIMAS sra. Kathleen Ruiz-Paskel.
Pa loke ta pregunta number 2, Minister Croes a indica cu den e ultimo dos añanan, su persona tabata den diferente reunionnan publico den Staten. Ultimo biaha tabata dia 14 di December 2023, na unda el a duna splicacion amplio pa cu su maneho di integracion, como
tambe tocante e relacion cu sra Ruiz-Paskel. Minister Croes a indica di a duna splicacion amplio di e casonan den corte y cu lo actua conforme e veredictonan di hues.
Minister Glenbert Croes na diferente ocasion tabata den reunionnan di Parlamento pa presenta y elabora riba su maneho di integracion. Manera por constata riba e prueba adhunto, na Juni 2023 e mandatario a entrega su maneho di integracion. Desde e dia ey nada no a cambia. Tur cos a keda mescos.
Cu esaki e mandatario ta refuta por completo e acusacion sin base di e parlamentario.