Otro luna ta cumpli 73 aña cu Lago All Stars a hunga un wega di basketball contra Club Caribe na cancha di Caribe pa recauda fondo pa Irene Jacobs Fund, cu miembronan di Aruba Lions Club a crea pa yuda e mucha di Dakota.
Jossy Mansur (d.f.m) doño y redactor di Diario y Clyde Harms, dos hungado di Club Caribe a convence Jim Downey (d.f.m) pa participa cu un ekipo di Lago Colony den un wega historico cu nan tabata planea pa yuda Lions Club den nan empeño asina nobel.
Jim Downey tabata instructor di educacion fisico na LAGO y tabata hopi activo den sport en general paden y pafo di Lago Colony. Su prome matrimonio cu un muhe Arubiano a caba den divorcio y depues el a bolbe casa cu un Arubiano, Ida Lee Every, cu ken el a biba na Eagle Colony te dia di su morto.
Irene Jacobs tabata un mucha di apenas 7 aña tempo el a corta su esofago (slokdarm) riba dia di Pasco 1946. Pa falta di recurso, no por a haci e operacion necesario. Na 1948 Lions Club a tende di e problema aki y e club civico a dicidi di recauda placa pa manda Irene Merca pa haya e tratamento y haci e operacion necesario.
All Stars di Lago Colony a gana e wega 33 – 29 y Earl Cook, capitan di e ekipo a rcicibi e trofeo cu e organisadonan a pone disponibel. Segun Esso News, tabatin un “large crowd”. Tur placa cu a colecta na entrada a bay pa e Fund.
No por a haya e suma cu e wega a genera, pero ta un hecho cu dos luna despues Irene Jacobs por a biaha pa Temple University na Philadelphia caminda Dr. Chevalier Jackson, e famoso specialista di garganta a oper’e.
Desde e fecha ey a organiza hopi evento deportivo pa causanan humanitario, pero e wega di basketball di 73 aña pasa ta esun cu a pasa den historia.