“Algo que he disfrutado inmensamente ha sido mi encuentro con el papiamento… me ha acercado a una lengua musical, de léxico florido, sintaxis única y construcciones gramaticales sorprendentes.”
Esaki ta e reaccion cu un Venezolano a manda pa mi despues di lesa (sin cu el a tuma un les di nos idioma materno!), un buki na Papiamento cu mi a regal’e.
Como autor di tres buki na Papiamento y mas di 400 articulo publica den e corantnan di Aruba, imprimi y digital, mi a sinti mi hopi orguyoso ora cu mi a lesa e sentimentonan pa nos idioma. A drenta mi un gran felicidad cu mi kier a comparti cu otronan cu ta stima nos lenga y a traha duro pa formalis’e.
Un di nan ta nos ilustre linguista Ramon Todd Dandare kende a observa entre otro, “Ta di lamenta cu den termino general nos propio hendenan NO ta mira (scucha) e beyesa, propiedad y exclusividad di nos lenga mama. Hopi biaha … pafo di nos isla(nan), nan ta duna nos lenga mas balor y respet cu nos mes ta haci”. Ki berdad esaki ta!
Un otro Papiamentologo di fama, Etley Lasten, un persona cu a traha hopi riba e dos manualnan di morfologia y sintaxis tambe a mustra su orguyo cu su trabou a haya reconocemento di un stranhero. Etley tambe a nota cu ta di aprecia cu … a haci mencion di e intonacion. “Papiamento ta un idioma tonal cu hopi rasgo unico”.
Ken ta e Venezolano cu a keda asina fascina pa nos Papiamento. E ta nada menos cu Dr. Juan Francisco Sans kende hunto cu su señora Mariantonia Palacios a duna un concierto di piano presenta pa Arubaaanse Kunstkring e diadomingo prome den Cas di Cultura. Dr. Sans ta un profesor nombra pa bida y investigador na Universidad Central di Venezuela. E ta un musico cu a dedica mas di 35 aña na tocamento, composicion y historiador di musica. El a skirbi un cantidad di buki y su articulonan cu ta raporta e descubrimentonan di su investigacionnan a haya reconocemento cientifico den diferente pais.
Y cua ta e buki cu Profesor Sans a lesa y a lag’e asina impresiona cu nos lenga Papiamento? E buki “Un Arubiano Na Libia” a wordo lansa aña pasa na october cu sosten di UNOCA y tur placa recauda cu benta di e buki aki ta bay pa Koningin Wilhelina Fonds pa combati y preveni cancer.
Profesor Sans a haya e buki asina interesante cu el a les’e den apenas tres dia! El a comenta riba mayoria di e topiconan cu e buki ta describi y e ta conclui skirbiendo: “La edición es impecable, hermosa, y las fotos históricas terminan de darle un áurea especial a todas las historias”. Esaki ta un bunita compliment pa Irene Peterson kende a redacta e buki. Segun Etley Lasten, “E bunita obra … ta floria cu tur sorto di ingrediente linguistico interesante”. Pero pa parafrase Ramon Todd Dandare, “Ta di lamenta cu den termino general nos propio hendenan no ta aprecia un buki skirbi y redacta pa nos mes hendenan”. Na oficina di Koningin Wilhelmina Fonds den Spinozastraat tras di e Watertoren di Playa tin varios shen copia di e buki cu ta sperando cumprado. Na de Wit/van Dorp na Dakota y na San Nicolas tambe tin hopi ehemplar. E prijs di e buki ta solamente 25 florin. E ta un bunita regalo.
Si un stranhero cu nunca antes a lesa Papiamento a aprecia e buki asina tanto, abo como Arubianon lo goz’e un mundo! Alabes bo lo aporta na Koningin Wilhelmina Fonds, un organizacion cu ta yuda nos comunidad inmensamente. [email protected]
