ORANJESTAD, Aruba: Parlamentario Hoek di Fraccion di MEP a tuma nota di e ponencia di señor Ryçond Santos do Nascimento cu MEP ta cobarde pa combati corupcion.
Lamentablemente ora nunca bo a tuma accion pa combati corupcion, bo no por reconoce e pasonan pa combati corupcion tampoco. Ta un realidad cu MEP ta trahando proactivo pa caba cu corupcion. Y mi ta ripiti, e realidad ta cu MEP a bin cu tres diferente ley cu ta regarda integridad. Y e partido cu Santos do Nascimento te cu un corto tempo atras tabata duna les y afilia na dje, a vota contra tur tres ley di integridad.
Santos do Nascimento ta indica cu ley no ta nifica nada, si hende no ta tene su mes na dje. E pregunta ta e ora: Ki bo estudio ta bal y ta ki tipo di les a ser duna na su partido berde cu nan a vota contra di tur tres ley?
Contrario na Santos do Nascimento su ponencia, Prome Minister Sra. Evelyn Wever-Croes a brinda tur transparencia den e caso Tulipan. Mas ainda nos Fraccion a pidi un Reunion Publico pa trata e rapport di CAD y Fraccion di MEP a haya oido pa esaki. Algo cu nunca a y lo wordo practica pa e partido cu Santos do Nascimento tabata sostene y forma parti di dje. E mas tristo ta cu Santos do Nascimento a postula su mes riba un lista sabiendo cu e lo ta hunto cu un candidato cu tabata un sospechoso y awo culpabel den caso di corupcion. Pero awe Santos do Nascimento kier laba man, pero ta e ta e mastermind di scol di corupcion crioyo di partido AVP.
Parlamentario Hoek ta admiti cu e tres leynan di integridad ta apenas e comienso di e fundeshi cu nos ta creando pa un pais liber di corupcion. Pesey, (1) gobierno a propone pa introduci un Integriteitskamer (2) ta empodera CAD pa investiga caso irregular (3) tur persona cu ta comete actonan coruptivo, lo mester asumi nan responsabilidad y mester retira for di nan posicion te ora cu Ministerio Publico caba cu investigacion.
Un diferencia grandi compara cu Gabinetenan Eman I y Eman II, unda cu Contraloria General (ARA) a adverti cu tin cosnan cu a cana hopi robes, pero no tin transparencia pa laga investiga e ex-ministernan Croes, Sevinger, Oduber, Visser, Dowers of Hooijboer-Winklaar. Di cual tur a conoce patronahe politico y añanan di bonanza riba custia di pueblo.
Similaridad den casonan Tulipan, Kwihi, Anglo ta cu Gabinete Wever-Croes mes a entrega keho manera cu a tuma nota cu irregularidadnan a wordo señala. No tabata oposicion, ni señor Santos do Nascimento a entrega keho na autoridad, pero ta gobierno mes a percura pa instancia concerni haci nan trabou. Para na banda y papia di corupcion ta facil, pero unda e kehonan oficial ta keda pa duna e instancia di husticia e base pa cana su caminda legal contra combatimento di corupcion?
E politica di laba man no ta funciona. Nos pais mester di politiconan y ciudadanonan cu ta bisa loke nan ta haci y haci loke nan ta bisa. Maske no tabata facil y a conoce resistencia, Parlamento number 10 y number 11 a introduci un transformacion den nos cultura politico pa eradica corupcion. Tur proyectonan cu no ta transparente mester wordo investiga. Adicionalmente, MEP a bin cu e ‘tussentijdse rapportage’ cu ta e Presupuesto Supletorio pa asina tin un miho control riba e uso di finanzas di pais Aruba. Pues, si constata cu tin proyecto dudoso esaki lo no wordo ehecuta y si un politico a haci un acto coruptivo e lo mester retira. Sinembargo e unico cu a keda, manera tur hende sa ta un parlamentario di AVP cu señor Santos do Nascimento a bin ta sostene desde un principio.
Berdad ta si, cu awe e no ta sostene nan mas, pero e cabaron a drumi hopi tempo den lodo y awe por papia con stinki e lodo ta hole. Y ta comprondibel cu eleccion ta cerca y ta busca modo pa laba man. Tempo lo demostra si di berdad e ta un di nan of cu e tambe lo kier combati corupcion crioyo efectivamente, Parlamentario Hoek a finalisa bisando.