ORANJESTAD – Diahuebs 15 di Februari ta un dia grandi pa Aruba. Minister Glenbert Croes a indica cu desde inicio di gobernacion, Gabinete Wever-Croes ta hibando un maneho pro activo pa baha prijs di awa y coriente pa e pueblo di Aruba. Un di e manehonan cu a bin ta activando y gestionando, ta pa por tin diferente oportunidad y alternativa di suministro di combustibel. Aruba ta den e proceso di transicion pa gas natural. Mientras tanto, mester cumpra “heavy fuel oil” cu ta cumpli cu e specificacionnan cu WEB ta exigi, pero di paisnan cu ta ofrece mas barata, cu e meta pa baha e prijs di awa y coriente.
Minister Croes a expresa di ta sumamente contento y orguyoso cu riba un dia manera 15 di Februari 2024, Gobierno ta logra pa e prome barco di “heavy fuel oil” di Venezuela yega Aruba. Cu esaki Gobierno por cuminsa e era, pa logra baha e tarifa di awa y coriente, manera a wordo priminti na e pueblo di Aruba. Esaki sigur ta habri e caminda pa crea e oportunidad pa Gobierno por cumpli cu e promesa aki.
Un di e prioridadnan di Gabinete Wever-Croes ta pa combati costo di bida. Y bahando e tarifa di awa y coriente, ta fundamental. Unabes cu logra baha e tarifa aki, e no lo solamente afecta positivamente cada hogar, sino tambe cada compania, reduciendo asina e gastonan di e compania. Cu menos gasto operacional, e companianan lo por cuminsa reduci prijsnan di producto y servicio pa e clientenan, afectando asina e costa di bida positivamente.
“Combati costo di bida, kiermeen combati pobresa, combati costo di bida, kiermeen logra progreso, y esaki pami, como Minister di Energia, y formando parti di Gabinete Wever-Croes II, ta e prioridad di mas grandi. Mi ta sumamente contento y orguyoso di mira cu e trabou cu nos a bin ta eherciendo tin su frutonan. Nos ta impulsando Aruba den un era nobo pa bienestar y na interes di nos Pueblo.”
E empeño cu Gobierno a bin ta desplegando, pa busca otro alternativanan, riba 15 di februari 2024 a duna su fruto cu e entrada di e barco transportando e prome carga di HFO na prijs mas barata. Minister Croes a expresa su gratitud na FMSA, TDEA, Harttree y PDVSA pa a coopera pa haci e logro aki na bienestar y interes di nos Pueblo.