Sero Pita – Diabierna merdia habitantenan a scucha un pito largooo y despues un zonido masha duro mes, tawata trata di un accidente mas ariba e crusada aki.
Pa basta tempo nos ta avisando di e crusada aki, cu ta uno peligroso pero nada nada ta wordo haci.
E biaha aki por a termina den un accidente fatal, debi cu un di e vehiculonan envolvi a bolter y cay bek ariba su 4 wielnan. Den e auto tawata tin 3 ocupante, un tata cu dos yiu homber.
Nan suerte tawata; cu tur tres tawata den seat belt bisti, strobando cu den e impacto un of mas por a wordo saca violentamente for di e auto cu consecuencia fatal.
Poco mas leu, ariba e caminda cu ta bay pa Ayo por a mira polis papiando cu e dama di edad, na stuur di e Toyota Yaris. A bin resulta cu e dama a subi caminda, momento cu e Astra tawata biniendo di panort y mester bisa esaki cu velocidad halto.
Segun testigonan, e Astra a bolter y bay para cara bek panort.
Paramediconan na yegada a solicita pa Brandweer, debi cu nan no por a habri e porta di chauffeur pa saca e tata di Astra. Pero, un bombero a yega y den un ranca e porta a habri y no mester a bay usa niun ekipo pisa di rescaté.
Dos ambulance a yega e sitio, pa atende cu esnan herida y transporta e chauffeur di e Astra pa Hospitaal.
Esnan cu ta encarga cu infrastructura; un biaha ta pidi boso pa haci algo ariba e crusada. E biaha aki un tiki mas morto a cay.
