Riba dia 26 di januari cu ta Dia Internacional di Aduana Minister Maduro tabata presente na e cena cu a wordo organisa pa e ocasion festivo aki. Minister Maduro a hiba un discurso pa felicita y gradici e Cuerpo di Aduana pa e trabounan cu ta wordo haci na bienestar di Aruba.
Den su discurso e mandatario a indica cu e aña aki e team di maneho di Aduana ta haya sosten tecnico pa asina por ehecuta algun cambio importante pa e funcionamento di Aduana. A menciona tambe e edificio nobo di Aduana cu awor cu a caba cu e parti legal, lo por sigui cu e trabounan necesario y ta spera cu por pone e prome bloki e aña aki ainda. E introduccion di e ley di ALDA cu ta e ley nobo pa Aduana tambe ta riba agenda como un prioridad pa asina Aduana por ta huridicamente miho ekipa pa haci nan trabou. Minister Maduro a indica cu e asistencia tecnico lo no ta solamente dirigi pa fortifica e organisacion, pero tambe lo concentra riba e desaroyo personal di e Aduanero.
Minister Maduro a gradici Aduana tambe pa locual ta e introduccion di BBO na frontera cu a wordo ehecuta na un manera eficiente y exitoso danki na e esfuerso conhunto di Aduana y DIMP. E mandatario a gradici tambe sr. Maduro di SADA pa nan input pa mehoracion di e Cuerpo di Aduana. Minister Maduro a finalisa su discurso gradiciendo full e Departamento di Aduana pa e trabou cu nan ta haci na bienestar di Pais Aruba.