ORANJESTAD: Diahuebs ultimo, Minister Endy Croes a atende e reunion di Plataforma 1. Plataforma 1 ta consisti di e dies (10) schoolbesturen, minister di Enseñansa, Departamento di Enseñansa y expertonan di e veld, entre otro, Duos. E reunion aki ta tuma luga un (1) bes den seis siman, unda cu ta bini hunto pa trata e temanan comun riba e tereno di enseñansa. Minister Endy Croes a duna un splicacion di e Doorlichting Rapport y e diestres (13) recomendacionnan. A repasa kico tur a haci caba y kico lo haci den aña 2024, pidiendo cooperacion di e veld pa duna nan contribucion den esaki pa tin un (1) solo linea pa sirbi e interes general. Banda di esaki, Minister Endy Croes a ricibi un sorpresa agradabel cu Sra. Mabel van Houten, kende ta representante di Onderwijs, Cultuur en Wetenschap (OCW) di Hulanda ta dos (2) dia na Aruba y a forma parti di e reunion aki. Sigur Sra. van Houten ta un parti crucial den e relacion cu Hulanda riba e tema di enseñansa. Concluyendo, Minister Endy Croes a enfatisa cu e tabata un bon reunion y un bon inicio unda cu Departamento di Enseñansa a duna un presentacion amplio di e avancenan y loke lo sosode encuanto di enseñansa den su totalidad.