Desde luna di juni 2023 Horacio Oduber Hospital a cuminsa comparti mensualmente diferente cifra cu comunidad pa asina brinda un claridad y transparencia den loke ta e cuido medico na HOH. Awo nos ta comparti cu boso e cifra total pa loke ta aña 2023 unda ta compara esaki cu aña 2022 y 2021 pa duna asina un miho comparacion. E transparencia aki ta parti di vision y mision di Hunta di Directiva hunto cu team di maneho di HOH pa asina clientenan, pashent y bishitante tin mas claridad di e diferente servicionan cu ta wordo brinda na nos Hospital.
Admision na HOH
Na aña 2023 tabatin un total di 9.919 pashent (0.5% menos cu 2022) cu a ser admiti na HOH cu un promedio di estadia di 4,2 dia. E cifra di admision ta menos cu na aña 2022. Motibo di esaki ta cu 60% di pashent na HOH ta wordo admiti via departamento di emergencia. Y por mira e volumen di pashent cu ta wordo mira na departamento di emergencia cual a baha na 2023, si compara esaki cu 2022 cu 5.2%. E ocupacion di cama a subi na 2023 te na 90,8% mirando cu na final di 2021 (80,5%) e totalidad di cama na HOH a ser reduci mas ainda door di e construccion andando na Hospital. Pues desde e tempo ey tin menos cama pa admiti pashent na Hospital.
Departamento di Emergencia
Na luna di juli 2023 departamento di emergencia a introduci un sistema di pre-triage cu enfoke pa determina si un pashent tin cu wordo atendi pa departamento di emergencia of e tin cu bay dokter na warda. Manera cu a introduci e sistema aki pre-triage di biaha a mira un reduccion na departamento di emergencia di 100 pashent pa dia pa 80 pashent pa dia. Esaki tambe ta un motibo pakico e parti di diagnostico di radiologia a baha, mirando cu tin menos peticion di parti di departamento di emergencia pa haci testnan diagnostico.
Consulta di pashent cerca specialista
Na 2023 tabatin un total di 79.175 consulta di pashent cerca specialistanan cu ta traha pa Hospital, cual ta similar na e cifra di consulta prome cu pandemia. Alabes esaki tambe ta e motibo pakico tin mas peticion pa testnan di laboratorio y consecuentemente tin mas operacion ta tuma luga si compara esaki cu aña 2021.
Baby cu ta nace na Aruba
Mundialmente por mira cu e total di baby cu ta nace anualmente ta bahando, pues no ta na Aruba so esaki ta un trend. Si por mira cu durante pandemia mas baby a nace y awo e ta bahando bek. Pues sigur un trend pa keda monitor den futuro.
Un aña den su totalidad hopi exitoso pa Hospital unda cu a brinda cuido na no solamente comunidad di Aruba, pero tambe turistanan cu ta bishita nos isla y tambe pashentan no documenta. Paso na final di dia como Hospital nos compromiso y vision ta pa keda pa brinda cuido medico accesibel di calidad na un y tur sin importa rasa, genero, edad y cultura paso nos semper t’ey.