En conexion cu e fecha natalicio di nos Libertador Betico Croes.
ORANJESTAD: Minister Endy Croes a inicia e siman di celebracion di Dia di Betico cu un bishita na scol basico Colegio Conrado Coronel. E mandatario di Enseñansa a ricibi un caluroso bonbini door di cabesante di e scol Sra. Lourdes Vries y cabesante suplente Sr. Franklin Dirksen. Despues di un reunion breve, Minister Endy Croes a bishita e alumnonan di klas 6, unda a comparti informacion di e historia, bida y logronan di Betico Croes. E meta di e bishita ta pa e alumnonan conoce un poco di e historia di e lucha cu Betico a hiba pa henter e Pueblo di Aruba pa por a logra e Status Aparte. Minister Endy Croes a pone enfasis cu dia 25 di januari no ta solamente un dia liber di scol, pero a splica e significado di e dia aki. Na final di e charla, Minister Endy Croes a haci e alumnonan pregunta y remarcabel ta cu nan tabata conoce caba diferente faceta di e historia di Betico, e lider stima pa su pueblo.
Cabesante di Colegio Conrado Coronel, Sra. Lourdes Vries a expresa di ta contento di a ricibi bishita di Minister Endy Croes na e scol. Sra. Vries a gradici Minister Endy Croes pa duna e alumnonan extra informacion di e historia di Betico Croes y e motibo cu ta liber dia 25 di januari, cual ta un dia pa nos celebra. Sra. Vries a indica cu e alumno- y docentenan a keda sumamente contento cu e splicacion cu nan a ricibi di e mandatario di Enseñansa, unda cu nan a ricibi extra informacion cu kisas cu tempo ta bay un tiki perdi, pero awe Minister Endy Croes a rebiba esakinan bek.
Minister Endy Croes ta gradici e cabesante di e scol Sra. Lourdes Vries, docente – y specialmente e alumnonan pa e bunita recepcion y pa un mainta asina ameno. Ban recorda y celebra Dia di Betico pa e herencia bunita cu el a laga atras, nos Status Aparte. Minister Endy Croes ta desea henter Pueblo di Aruba un feliz Dia di Betico!
